Италиянинг энг йирик банки РФдан еврода тўловлар қабул қилишни тўхтатади

Италиянинг энг йирик банки Intesa Sanpaolo 2025 йил 15 январдан бошлаб Россия банкларидан еврода тўловларни қабул қилишни тўхтатади. «Ведомости» газетасининг 23 декабр, душанба куни хабар беришича, банкнинг Россиядаги шуъба корхонаси - "Интеза" ўз мижозлари ва ҳамкорларини бу қарор ҳақида хабардор қилди ва бу маълумот Intesa Sanpaolo'нинг Миландаги бош қароргоҳида тасдиқланганини таъкидлади.

Хабарга кўра, чекловлар евродаги тўловларга нисбатан қўлланилади, Intesa Sanpaolo'нинг ўзида, шунингдек, унинг Италияда жойлашган шуъба корхоналари ва банклари ўртасидаги тижорат операциялари бундан мустасно. Бўлажак ўзгаришлар муносабати билан Италия банки уларни амалга оширишдан бош тортишнинг эҳтимолий оқибатларини олдиндан баҳолашни сўради.

«Ведомости» суҳбатдошларининг фикрича, бундай чекловлар, биринчи навбатда, хорижий контрагентлар билан еврода ҳисоб-китоб қилиш учун "Интеза"дан фойдаланган хизмат кўрсатиш ва саноат соҳаларидаги россиялик корпоратив мижозларга таъсир қилади. Мутахассислар ўзгаришларни Европа Марказий банкининг Россия Федерациясига қарши санкцияларга риоя қилиш талаблари билан боғлашмоқда.

Мелони: РФ миграциядан ЕИга путур етказиш учун фойдаланиши мумкин

Россия нафақат ҳарбий соҳада, балки Москва Европа ҳамжамиятининг бирлигини бузиш учун ноқонуний миграция ва бошқа механизмлардан фойдаланиши мумкинлиги сабабли ҳам ЕИ хавфсизлигига катта таҳдид солмоқда. Бу ҳақда 22 декабр куни Италия бош вазири Жоржа Мелони маълум қилди. Унинг сўзларидан Reuters иқтибос келтирди.

Финландия Шимолий ва Ўрта Ер денгизи минтақаларидаги хавфсизлик ва Жанубий Европадаги миграция масалаларини муҳокама қилиш учун Италия, Швеция ва Греция раҳбарлари ҳамда Европа Иттифоқининг ташқи ишлар ва хавфсизлик сиёсати бўйича олий вакили Кая Калласни шимолий Лапландияда қабул қилди.

«Биз таҳдид тасаввур қилганимиздан анча кенгроқ эканлигини тушунишимиз керак», деди Мелони матбуот анжуманида.

Унинг фикрича, Украинадаги уруш тугаганидан кейин Россиядан ЕИ хавфсизлигига таҳдид йўқолмайди ва Брюссел бунга тайёр бўлиши керак.

«Гап демократиямиз, жамоатчилик фикрига таъсири ҳақида кетяпти, бу Африкада содир бўлаётган нарсалар, хомашё, миграция воситалари билан боғлиқ, биз хавфсизлик тушунчаси жуда кенг эканлигини тушунишимиз керак», деди Италия вазирлар маҳкамаси раҳбари.

Швеция бош вазири Улф Кристерссон, ўз навбатида, ноқонуний миграция Европанинг шимоли ва жануби учун умумий муаммо эканини аниқлаштирди.