Бўстонлиқда 12 январгача ҳаракат бир томонлама бўлади

31 декабрдан 12 январга қадар Тошкент вилоятининг Бўстонлиқ туманидаги дам олиш масканлари — Амирсой, Белдерсой, Чимёнга транспорт ҳаракати бир томонлама ташкил этилади.

Тошкент вилояти Бўстонлиқ туманининг тоғли ҳудудларида йўлнинг маълум қисмида ҳаракат бир томонлама ташкил этилади. Бу ҳақда вилоят ИИББ Йўл ҳаракати хавфсизлиги бошқармаси хабар берди.

Қайд этилишича, Бўстонлиқ туманидаги тоғли ҳудудларда жойлашган дам олиш масканларида 31 декабрдан 2025 йил 12 январга қадар фуқаролар ташрифи одатдагидан кўпроқ бўлиши кутилмоқда. Шуни инобатга олган ҳолда Амирсой, Белдерсой, Чимён каби дам олиш масканларига олиб борувчи йўлда хавфсизлигини таъминлаш ва тирбандликларнинг олдини олиш мақсад қилинган.

Режага кўра, 4Р6 Тошкент—Чирчиқ—Чимён автомобил йўлининг 57-километридан бошлаб, мазкур йўлнинг 92-километригача, яъни 4Р10 автомобил йўли билан туташган жойгача транспорт воситаларининг ҳаракати бир томонлама ташкил этилади.

Ҳаракат бир томонлама ташкил этилган йўлнинг бошида 5.5 (бир томонлама ҳаракатли йўл) ва унинг охирида 5.6 (бир томонлама ҳаракатли йўлнинг охири) ахборот кўрсатгич йўл белгилари, шунингдек, ҳаракатланиб кириш тақиқланган қисмида 3.1 (кириш тақиқланган) йўл белгиси ўрнатилади.

#Тошкент вилояти #Чимён #Бўстонлиқ