Axios: Apple раҳбари Трамп инаугурациясига 1 млн доллар хайрия қилади

Apple бош директори Тим Кук АҚШнинг сайланган президенти Доналд Трамп инаугурация жамғармасига шахсан 1 миллион доллар хайрия қилади. Бу ҳақда ўз манбаларига таяниб Axios хабар берди.

«Алабама штатининг мағрур фуқароси ҳисобланувчи Кук инаугурацияни Американинг буюк анъанаси деб билади ва унга бирдамлик руҳи сифатида хайрия қилади», — дейди нашр суҳбатдоши. Axios’нинг қайд этишича, Apple корпорацияси номидан хайрия амалга ошириши кутилмаяпти.

Facebook, Instagram ва WhatsApp ижтимоий тармоқларига эгалик қилувчи Meta ҳамда Amazon компаниялари, шунингдек, OpenAI раҳбари Сэм Алтман ҳам Трампнинг инаугурация жамғармасига ўз хайрияларини амалга оширишларини маълум қилганди.

The Wall Street Journal’нинг ёзишича, Apple бош директори Тим Кук Доналд Трамп билан шахсий муносабат ўрнатиш учун йиллар давомида ҳаракат қилган. Axios маълумотларига кўра, Кук Трампнинг биринчи президентлик муддати давомида у билан кўп маротаба учрашган, шунингдек, 2024 йил декабр ойида сиёсатчининг Мар-а-Лагодаги қароргоҳида ўтказилган кечки овқатда ҳам иштирок этган.