Японияда 2720 йилга бориб бир нафар 14 ёшдан кичик бола қолиши мумкин — прогноз

Япон олимлари прогноз қилишича, 2720 йил бошига келиб мамлакатда 14 ёшдан кичик атиги бир нафар бола қолади. Тохоку университети профессори Хироси Есиданинг сўнгги ҳисоб-китоблари шундан далолат бермоқда, деб хабар берди The Japan Times газетаси.

Илгари бундай вазият 2821 йилда юз бериши тахмин қилинганди. Аммо болалар сонининг камайиш жараёнини кузатиб борувчи онлайн соатлар ёрдамида қайта ишланган янги маълумотлар энди бошқа санани — 2720 йил 5 январни кўрсатмоқда. Ушбу соатлар Японияда ёш авлод улушининг тез суръатлар билан пасайиб бораётганини акс эттиради.

Охирги ҳисоб-китоблар Японияда 2024 йилги туғилиш статистикасини ҳисобга олган ҳолда амалга оширилди.

Япониядаги демографик инқироз

Туғилишлар сонининг пасайиши умумий аҳоли сони қисқариши фонида яққол кўзга ташланмоқда.

Аҳолининг кескин қариши ва туғилиш даражасининг пасайиши Япония ҳукумати ва жамияти учун асосий муаммоларга айланмоқда. Олимларнинг фикрича, демографик сиёсатда ўзгаришлар бўлмаса, вазият ёмонлашишда давом этади. Ҳозирги кунда Япония аҳолисининг атиги 11 фоизи 15 ёшгача бўлган болалардан иборат, қарийб 30 фоизи эса 65 ёшдан ошган.