Қозоғистонда коррупционер амалдорларнинг ошкора рўйхати тузилади

Ташаббуснинг мақсади жамиятда коррупцияга нисбатан муросасизликни шакллантиришдан иборат экани таъкидланмоқда.

Фото: caravan.kz

Қозоғистонда коррупционерларнинг давлат реестри яратилади. Бу ҳақда Коррупцияга қарши курашиш агентлиги раисининг биринчи ўринбосари Улан Сарқулов маълум қилди, деб ёзди Tengrinews.

«Бу профилактика воситаси. Унинг асосий мақсади - жамоатчиликнинг қоралаши орқали жамиятда коррупцияга нисбатан муросасизликни шакллантиришдан иборат. Реестрга оғир ва ўта оғир коррупция жиноятларини содир этганликда айбдор деб топилган шахслар тўғрисидаги маълумотлар киритилади. Жисмоний шахсларни реестрга киритиш учун суднинг қонуний кучга кирган айблов ҳукми асос бўлади», деди Сарқулов.

Реестр Коррупцияга қарши курашиш агентлигининг веб-сайтига жойлаштирилади. Унда коррупцияга учраган мансабдор шахснинг фамилияси ва исми, унинг иш жойи ва жиноят содир этилган пайтдаги лавозими, жиноят таркиби, айблов ҳукми тафсилотлари ва тайинланган жазо кўрсатилади.

Реестрдан чиқариш қонуний кучга кирган ва судланганлик олиб ташланган оқлов ҳукми асосида амалга оширилади.