Зеленский: Мюнхен конференцияси олдидан Украинага Трамп жамоасидан «жиддий одамлар» келади

14-16 феврал кунлари бўлиб ўтадиган Мюнхен хавфсизлик конференцияси бошланишидан олдин Украинага АҚШ президенти Доналд Трамп жамоасининг вакиллари ташриф буюради. Бу ҳақда мамлакат президенти Володимир Зеленский маълум қилди.

Трамп маъмурияти амалдорларининг ташрифи ҳақида Украина етакчиси Европа инвестиция банки президенти Надежда Калвино билан ўтказилган қўшма матбуот анжумани вақтида эълон қилди.

Зеленский Украина ва АҚШ жамоатларининг умумий мақсади Путинни тўхтатиш ҳамда Украинага қандай қилиб хавфсизлик кафолатларини бериш эканини таъкидлади.

«Жорий ҳафта Мюнхен конференцияси бошлангунга қадар Украинада президент Трамп жамоасидан бўлган айрим жиддий одамлар бўлади. Кейин эса Мюнхен конференцияси бошланади, унинг доирасида қатор учрашувларим бор, жумладан, АҚШ вице-президенти билан ҳам», — дейди Зеленский.

Украина президенти қанақа «жиддий одамлар» ҳақида гап кетаётганига ойдинлик киритмаган.

Доналд Трамп Россия ва Украина ўртасидаги урушни тўхтатишни президентлик дастурининг асосий бандларидан бири деб атаган. Bloomberg манбалари Трампнинг Украина ва Россия бўйича махсус вакили Кит Келлог урушни тўхтатиш бўйича АҚШ режасини Мюнхен хавфсизлик конференциясида тақдим этишини маълум қилганди. Келлогнинг ўзи бу хабарни рад этган. Унинг айтишича, режани Трамп тақдим этади, аммо «бу кейинги ҳафта содир бўлмайди» (10-16 феврал).

Володимир Зеленский 6 феврал куни Трампнинг ҳозирча Украина—Россия урушини тўхтатиш бўйича расмий режаси йўқлигини маълум қилганди.

Аввалроқ Кит Келлог АҚШ Украинадаги урушни тўхтатиш учун Россияга қарши санкциялар босимини оширишга тайёр эканини билдирган эди. Келлог ҳозирга қадар РФга нисбатан қўлланган чекловларни «10 балли шкалада учга» баҳолаган. Унинг ҳисоблашича, Россия нефтини қазиб олиш ва экспортига нисбатан санкциялар кучайтирилиши мумкин.