Юк машинасини бўлакларга бўлиб олиб киришга уриниш аниқланди

“Сирғали” божхона постида хориждан келтирилган 11 турдаги авто эҳтиёт қисмлари аслида бир бутун ҳолдаги товар – самосвал экани фош бўлди, дея хабар тарқатди Божхона қўмитаси.

“Транспорт воситасини қисмларга ажратиб гўёки авто эҳтиёт қисм ниқоби остида олиб киришга уриниш орқали юк эгаси 800 млн сўмлик божхона тўловларини “тежамоқчи” бўлган”, – дейилади расмий хабарда.

Қўмита эълон қилган видеода самосвалнинг қисмлари божхона омбори ҳовлисида йиғилиб, тайёр транспорт воситасига айлантирилгани ва юра бошлагани кўринади.

Иқтисодчи Отабек Бакиров бу ҳолатга муносабат билдириб, Ўзбекистонда самосваллар учун 70 фоиз ва яна ҳар бир куб мотор ҳажми учун 3 долларлик бож ўрнатилганини қайд этди.

У, шунингдек, худди шундай самосваллар Самарқанддаги юк машиналари заводида ҳам йиғилишига эътибор қаратди. Бакировнинг фикрича, юқори божлар айнан шу “ишлаб чиқарувчи”ни ҳимоя қилиш учун жорий этилган

“Божхона қўмитасига ташаккур дейман. Чунки улар Ўзбекистоннинг 34 йиллик “маҳаллийлаштириш” ёлғонларини битта видео билан очиб ташлашди. Чунки бунақа ёлғонлар фақат самосваллар билан тугамайди-да!” – дея ёзди иқтисодчи.

Ню Йорк университети профессори, иқтисодчи Беҳзод Ҳошимовнинг сўзларига кўра, бундай ҳолатнинг рўй бераётгани – савдо ва саноат сиёсатидаги хатолардан дарак беради.

“Агар мен Ўзбекистонда савдо сиёсати ёки умуман саноат сиёсатига масъул шахс бўлганимда, бу воқеадан уялар эдим”, деди у.

Унинг қайд этишича, юк машиналарининг қимматлигидан ҳар бир ўзбекистонлик иқтисодий зарар кўради.

“Ҳар бир истеъмол қилган товарингизда, ҳар бир қурилаётган бинода бу сунъий нарх юқорилиги ўз аксини албатта топади. Юк машиналари деярли ҳар бир иқтисодий алмашувда қаердадир қатнашган бўлади – демак, унинг таъсири йўқ бўлган соҳанинг ўзи йўқ”, – дея ёзди иқтисодчи.