Temu Ўзбекистонда юридик шахс сифатида рўйхатдан ўтди

Temu маркетплейси юридик шахс – Ўзбекистон резиденти сифатида рўйхатдан ўтди. Бу ҳақда Солиқ қўмитаси хабар берди.

Қўмита ахборотида қўшимча тафсилотлар келтирилмаган.

Temu'нинг Ўзбекистонга расман кириб келиши ҳукуматнинг босими ортидан рўй берди.

4 март куни Истиқболли лойиҳалар миллий агентлиги ва Солиқ қўмитаси қўшма баёнот билан чиқиб, Temu Ўзбекистон қонунчилигига мувофиқ ишламаётгани учун маркетплейс фаолиятига чеклов киритилишини эълон қилганди. Ўзбекистонликларга платформада ортиқ буюртма бермаслик, ҳали етиб келмаган буюртмалар учун тўловни эса қайтариб олиш тавсия этилганди.

Расмийлар буни Temu томонидан Ўзбекистоннинг электрон тижорат, чакана савдо, реклама, шахсга доир маълумотлар, истеъмолчилар ҳуқуқларини ҳимоя қилиш, муаллифлик ҳуқуқи ва турдош ҳуқуқлар соҳасидаги қонунларига риоя қилинмаётгани билан изоҳлаган.

2024 йилда охирида қабул қилинган Вазирлар Маҳкамаси қарорига кўра, 2025 йил 1 июлдан эътиборан Ўзбекистонда рўйхатдан ўтмаган хорижий электрон савдо платформаларининг фаолияти тақиқланади. Улар ё Ўзбекистонда солиқ тўловчи сифатида рўйхатдан ўтиши ёки шуъба корхонасини ташкил этиши керак бўлади.

Маркетплейслар соҳаси регулятори – Истиқболли лойиҳалар миллий агентлигига кўра, ўтган йили ўзбекистонликлар Temu'дан жами 10 млн доллардан ортиқ нархдаги товарларни харид қилган.

Март ойи бошида чеклов ҳақида эълон қилингач, Temu Ўзбекистонда энг кўп юклаб олинган иловалар рўйхатидан тушиб кетганди.

Маълумот учун, январ ойида eBay ҳам Ўзбекистонда солиқ тўловчи сифатида рўйхатдан ўтган. Аввалги йилларда Netflix, Amazon, Google, Apple, Zoom ва бошқа йирик компаниялар ҳам Ўзбекистонда солиқ тўловчига айланган.