Тошкент шаҳар ФВБ бошлиғи ўринбосари қамоққа олинди

Тошкент шаҳар ФВБ бошлиғи ўринбосарига нисбатан жиноят иши қўзғатилди. У тамагирлик йўли билан пора олиб келганликда гумонланмоқда.

Фото: Тошкент шаҳар ФВБ

Коррупцияга қарши курашиш доирасида ДХХ томонидан олиб борилган тезкор-қидирув тадбирлари давомида Тошкент шаҳар Фавқулодда вазиятлар бошқармаси бошлиғи ўринбосарининг ноқонуний ҳаракатлари фош этилди.

Маълум қилинишича, ушбу мансабдор шахс ўз хизмат мавқеини суиистеъмол қилган. У Тошкент шаҳрида қурилиши режалаштирилган биноларнинг эскиз лойиҳасини тасдиқлаш, ёнғиндан автоматик тарзда хабар берувчи қурилмалар бўйича тузилган далолатномаларни имзолаш ҳамда янги қурилган ёки реконструкция қилинган биноларни давлат қабул комиссиясига фойдаланишга топширилишида ижобий хулоса бериш эвазига доимий равишда тамагирлик йўли билан пора олиб келган.

Бундай объектлар ичида умумий ўрта таълим мактаби ва тиббиёт муассасаси бинолари ҳам бор.

Ҳозирда мазкур шахсга нисбатан Жиноят кодексининг тегишли моддалари билан жиноят иши қўзғатилиб, қамоққа олиш тарзидаги эҳтиёт чораси қўлланган.

Ҳолат юзасидан дастлабки тергов ҳаракатлари олиб борилмоқда.

#порахўрлик #Тошкент шаҳар ФВБ