Жанубий Корея тарихидаги энг йирик ўрмон ёнғинларида гумонланувчи қўлга олинди

Жанубий Корея жануби-шарқида ўрмон ёнғинларига сабаб бўлишда гумонланаётган шахс полиция томонидан қўлга олинди, деб ёзади Hankyoreh нашри.

Кенсан-Пукто провинциясида яшовчи 56 ёшли эркак ўрмон ҳимояси тўғрисидаги қонунни бузишда гумонланиб ушланган. У 22 март куни соат 11:24 да Квесан қишлоғидаги ўрмон ҳудудида ёнғин юзага келишига сабабчи бўлган.

Гумонланувчи ўз айбини инкор этган. Аммо ёнғин ҳақида биринчи бўлиб хабар қилган унинг қизи гувоҳлик кўрсатмасини берган.

«Катта бобомизнинг қабристонида ёнғин бошланди. Отам дарахтни синдиришга уринди, лекин уддалай олмади, шу боис уни зажигалка билан ёқишга қарор қилди. Бироқ кучли шамол туфайли учқунлар тарқалиб, ёнғин бошланди», — дейди гумонланувчининг қизи.

Ийсонда бошланган ёнғин тезда тўртта қўшни туман — Андон, Чхонсон, Анян ва Йондокка тарқалган. Ёнғин кўлами кенгайиб кетгани боис 28 март куни Кенсан-Пукто полицияси маҳаллий Ийсон ҳукуматидан тергов ишларини ўз назоратига олган.

Эртаси куни полиция Суд экспертизалари бўйича миллий институти билан ҳамкорликда ёнғин ўчоғини кўздан кечирган. Айни вақтда Ўрмон тадқиқотлари миллий институти, Суд экспертизалари миллий институти ва ўт ўчириш хизматлари билан кейинги ҳаракатларни келишиш устида иш олиб борилмоқда.

Ийсондаги ёнғин Жанубий Корея тарихидаги энг ҳалокатли ўрмон ёнғинига айланди. Фожиа оқибатида 26 киши, жумладан, вертолёт учувчилари, ўт ўчирувчилар ва маҳаллий аҳоли ҳалок бўлди.

Аланга 4 мингдан ортиқ бинони, хусусан, тураржой бинолари ва заводлар, тарихий объектларни кулга айлантирди. Дастлабки маълумотларга кўра, ёнғин 45 минг гектардан ортиқ майдонни эгаллаган — бу Сеул ҳудудининг 75 фоизи демак. Бу мамлакат тарихидаги энг катта ўрмон ёнғини талафоти ҳисобланади.