USAGM «Озодлик радиоси»нинг Россиядаги эшиттиришлари трансляциясини тўхтатди

Сунъий йўлдошнинг ўчирилиши «Настоящее время» телеканалининг Россия, Украина, Марказий Осиё ва Шарқий Европага 24 соатлик рус тилидаги эфирига таъсир қилди, деди медиа корпорация ижрочи директори Стивен Капус.

Фото: David W Cerny/REUTER

АҚШнинг Глобал медиа агентлиги (USAGM) 3 апрел, пайшанба куни "Озод Европа радиоси/Озодлик радиоси"нинг рус тилидаги эшиттиришларини трансляция қилувчи сунъий йўлдош хизматларини ўчириб қўйди. «Биз бугун ишга келдик ва Россияни қамраб олган сунъий йўлдош хизматлари USAGM томонидан ўчирилганини аниқладик», деди "Озод Европа радиоси/Озодлик радиоси" ижрочи директори Стивен Капус AFP'га.

Қарор «Настоящее Время» телеканалининг Россия, Украина, Марказий Осиё, Шарқий Европа ва бошқа минтақаларга 24 соатлик эфирига таъсир кўрсатди. Капуснинг сўзларига кўра, Россия Федерациясидаги томошабинлар энди ўз экранларида қизил фонда қуйидаги ёзувни кўришмоқда: «Шуни афсус билан хабар қиламизки, Америка Қўшма Штатларининг Глобал медиа агентлиги «Настоящее Время» трансляциясини тўхтатишга қарор қилди». USAGM ҳозирча ҳодисага изоҳ бермади.

25 март куни Вашингтондаги федерал округ суди АҚШ президенти Доналд Трамп маъмурияти ва USAGM бош директори Кари Лейкнинг "Озод Европа радиоси/Озодлик радиоси" медиа корпорациясини молиялаштиришни тўхтатиш ҳақидаги қарорини вақтинча блоклади. Судя Ройс Ламберт ҳукм ижроси "Озод Европа радиоси/Озодлик радиоси"га тузатиб бўлмайдиган зарар етказади, деган хулосага келди. «USAGM раҳбарияти бир ибора билан ва ҳеч қандай асоссиз "Озод Европа радиоси/Озодлик радиоси"ни президент буйруқ берган бўлса ҳам, фаолиятини тўхтатишга мажбурлай олмайди», — деди у.

2025 йилнинг октябригача "Озодлик радиоси" АҚШ федерал ҳукуматидан медиакомпания фаолияти учун Конгресс томонидан ажратилган яна 77 миллион доллар олиши кутилмоқда. "Озод Европа радиоси/Озодлик радиоси" 1953 йилда ташкил этилган мустақил медиа корпорациядир. Унинг иши Доналд Трамп Оқ уйга қайтганидан сўнг ходимлари қисқартирилган Глобал медиа агентлиги орқали АҚШ Конгресси томонидан ажратилган маблағлар ҳисобидан молиялаштирилади.