Reuters: Трампни танқид қилаётган давлат хизматчиларини кузатишда сунъий интеллектдан фойдаланилмоқда

Илон Маск раҳбарлик қилаётган Ҳукумат самарадорлиги департаменти (DOGE) ходимлари АҚШ президенти Доналд Трампга нисбатан садоқатсизлик аломатларини аниқлаш мақсадида сунъий интеллектдан фойдаланиб камида битта федерал агентликнинг хабарларини кузатмоқда. Бу ҳақда Reuters агентлиги ўз манбаларига таяниб хабар берди.

Бундан ташқари, DOGE ходимлари мулоқот учун Signal мессенжеридан фойдаланяпти, «бу эса қайдларни юритиш қоидаларини потенциал бузиш ҳисобланади, чунки ушбу мессенжерда хабарлар маълум вақт ўтгач ўчиб кетиши мумкин».

Маълумотларга кўра, сунъий интеллект ва Signal мессенжеридан фойдаланилиши киберхавфсизлик бўйича мутахассислар орасида «хавотирларни кучайтирган». Уларнинг фикрича, Маск ва Трамп маъмурияти сунъий интеллект ёрдамида тўпланган маълумотлардан «ўз манфаатларини илгари суриш ёки сиёсий сабабларга асосланган таъқибларда» фойдаланиши мумкин.

Reutersʼнинг ёзишича, Атроф-муҳитни муҳофаза қилиш агентлигида Трамп вакиллари айрим ходимларга Маскнинг жамоаси АҚШ президенти ва DOGE раҳбарига нисбатан душманона муносабатда бўлганларни аниқлаш учун хабарларни мониторинг қилишда сунъий интеллектни жорий этаётганини айтган.

Илон Маск — Доналд Трампнинг асосий маслаҳатчиларидан бири. У Трамп АҚШнинг 47-президенти сифатида лавозимга киришганидан кейин Ҳукумат самарадорлиги департаменти раҳбарига айланди. DOGE Америка ҳукуматининг иш самарадорлигини ошириш, жумладан, «самарасиз» амалдорларни ишдан бўшатиш билан шуғулланади. Январ ойида иш бошлаган департамент 1,5 йилдан кейин фаолиятини тўхтатиши керак. CNN’нинг март ойидаги ҳисоб-китобларига кўра, DOGE фаолияти давомида федерал агентликлардан 121 мингдан ортиқ одам ишдан бўшатилган.