Дума россияликларни чет эл ташкилотлари билан ҳамкорлик учун 7 йилгача қамашга рухсат берди

Россия Давлат думаси депутатлари армияни «обрўсизлантириш», Россияга қарши санкцияларга чақириқлар ва ҳукуматга маъқул бўлмаган халқаро ташкилотлар билан ҳамкорлик учун жазони кучайтирувчи қонунлар пакетини қабул қилди.

Фото: РФ Давлат думаси

Шунингдек, Давлат Думаси Россияни тарк этган шахсларни 20 турдаги жиноятлар бўйича сиртдан суд қилишга рухсат берди ва «чет эл агенти» сифатида тан олиш мезонларини кенгайтирди. Қонунлар пакети «мамлакат суверенитетини ҳимоя қилиш» мақсадида қабул қилингани маълум қилинди.

Хусусан, армияни «обрўсизлантириш» (ЖК 280.3-моддаси) ва Россия иштирок этмайдиган халқаро ташкилотларга «манфаатдорлик ёки пулли шартнома асосида» кўмак бериш (284.3-модда) 7 йилгача озодликдан маҳрум қилиш билан жазоланади. Агар фуқаро шундай манфаатли ният билан санкцияларга чақирган бўлса (284.2-модда), унга 5 йилгача қамоқ жазоси берилиши мумкин. Барча ҳолатларда мулкни мусодара қилиш ҳам кўзда тутилган. Муҳим ўзгаришлардан бири — армияни «обрўсизлантириш» ва санкцияларга чақириқлар учун жиноят иши қўзғатиш учун эндиликда маъмурий жазони кутмасдан тўғридан тўғри жиноий иш очиш мумкин бўлади.

Иккинчи қонун лойиҳаси Россияни тарк этган фуқароларни «дискредитация», ҳарбий «фейклар» тарқатиш, «нацизмни оқлаш», «ҳарбий дафн жойлари ва ёдгорликларга шикаст етказиш» моддалари бўйича сиртдан суд қилиш имконини беради. Шунингдек, терроризм, экстремизм, сепаратизм, оммавий тартибсизликка чақириш, тажовузкор уруш бошлаш, Россия ҳудудий яхлитлигига таҳдид, санкциялар, «хорижий агент» мажбуриятларидан бўйин товлаш, «нохуш ташкилотлар» фаолиятида иштирок этиш ёки уни молиялаштириш ҳолатлари ҳам бу тартибга киради.

Учинчи қонун лойиҳаси «чет эл агентлари» реестрига киритиш учун асослар рўйхатини кенгайтиради. Ваколатли органлар бу мақомни халқаро ташкилотлар ёки чет давлат органларининг Россия хавфсизлигига қарши йўналтирилган қарорларини бажаришда иштирок этган шахсларга беришлари мумкин.

Масалан, бу орқали Халқаро жиноий суд (Ҳаага) томонидан Украина болаларини зўравонлик билан депортация қилгани учун президент Владимир Путинни ҳибсга олиш ордерини амалга оширишга уринаётган шахслар ҳам қамраб олинади. Шунингдек, мамлакат хавфсизлигига қарши фойдаланилиши мумкин бўлган ҳарбий ёки ҳарбий-техник характердаги маълумотларни йиғишга фуқароларни жалб этганлар ҳам «чет эл агенти» деб топилади. Бундай фаолиятни молиялаштириш ҳам алоҳида асос сифатида белгиланган.

#Россия #чет эл агенти