«Арсенал» «Реал»ни йирик ҳисобда мағлуб этди

ЕЧЛ. Чоракфинал
«Арсенал» – «Реал» 3:0
Голлар: Райс 58, 70, Мерино 75
«Арсенал» – Райя, Тимбер (Уайт, 90+1), Салиба, Кивер, Люис-Скелли, Парти, Райс (Тирни, 80), Эдегор, Мерино, Мартинелли, Сака (Троссар, 74).
«Реал» – Куртуа, Рюдигер, Асенсио, Алаба (Гарсия, 79), Валверде, Камавинга, Модрич (Васкес, 71), Беллингҳем, Родриго (Диаз 85), Мбаппе, Винисиус.
Огоҳлантиришлар: Парти (54), Камавинга (70).
Четлатиш: Камавинга (90+4)

Микел Артетадан бу мавсумда кашфиётчи бўлиш талаб этилмоқда. Мавжуд форвардларнинг иккиси (Габриэл Жезус ва Ҳаверц) жароҳат олиб, мавсум якунига қадар сафдан чиқиши яримҳимоячи Меринонинг амплуасини вақтинчага ўзгартиришни талаб қилди. Мудофаанинг чап қанотидаги муаммолар эса болалигидан бери майдон марказида ўйнашга ихтисослашган Люис-Скеллининг бошқа қирраларини очишга ёрдам берди. Натижада испаниялик туғма тўпурарлигини, «канонирлар» академиясининг 18 ёшли тарбияланувчиси эса латерал ролида ҳам жуда яхши ўйнай олишини кўрсатди ва у нафақат клубида, балки Англия миллий жамоасида ҳам асосий таркибнинг алмаштириб бўлмас футболчисига айланди.

Шундай экан, АПЛнинг энг яхши марказий ҳимоячиларидан бири, қолаверса, рақиб жамоа дарвозаси атрофидаги стандарт вазиятларда кескинликни икки каррага оширадиган Габриэл Магалянснинг жароҳатини Лондоннинг қизил-оқ қисми матонат билан қабул қилди. Қолаверса — ҳатто Калафиори ва Томиясунинг жароҳатини ҳисобга олганда ҳам — Артетанинг ихтиёрида марказий ҳимояда ўйнаши мумкин бўлган яна уч футболчи қолганди. Алмаштириб бўлмас Салибанинг ёнига Кивиор ёки Уайтдан бирини тушириш мумкин эди. Уларнинг иккинчисида ўйин амалиёти бўлмагани туфайли мураббий полшалик ёш футболчини танлади.

Шуни таъкидлаш керакки, Артета қанотларда фойдаланаётган футболчиларнинг барчаси аввал марказда ҳам ўйнаган. Бу жиҳат испаниялик мутахассиснинг ватандошлари билан учрашув олдидан қандай тактик қарорлар қабул қилганини тушуниш учун муҳимдир. Тўпга эгалик ҳолатида «Арсенал» уч ҳимоячи билан ўйнади (ўнгдаги Тимбер марказ томон силжиди), Люис-Скелли эса таянч зонасига кўтарилиб, Партей билан жуфтлик ҳосил қилди. Бу жамоага тўпни олдинга олиб чиқишда қўшимча имкониятлар тақдим этди, шунингдек, майдон марказида сон жиҳатдан устунликни таъминлади, «Реал» марказида ёши қирққа қараб кетаётган Модрич тушганида бу айниқса қўл келди, Карло Анчелотти Валвердени марказдан олиб, мудофаанинг ўнг қанотига ташлаганди.

Лекин бу мажбурий чора эмасди, балки Лукас Васкеснинг ҳимоявий маҳорати рақиб вингери Габриэл Мартинеллини жиловлаш учун етарли эмаслигини тан олиш эди. Нариги қанотда ҳам шунга ўхшаш қарор қабул қилинди, Менди йўқлигида Сакага қарши туриш вазифаси ёш Фран Гарсияга эмас, тажрибали Алабага ишониб топширилди. Моҳиятан, «канонирлар» ЕЧЛнинг амалдаги ғолибига эмас, балки «Реал» нисбатан кучсиз деб қаралган рақибга мослашди. Бу айниқса мезбонларнинг тўлиқ устунлигида ўтган биринчи бўлимда сезилиб турди. Ҳа, одатда «Реал»га гол уриш учун кўп нарса талаб этилмайди ва Беллингҳемнинг Мбаппега берган ажойиб паси ҳам буни эслатиб қўйди. Аммо Килианнинг «Арсенал» афсонаси Тиерри Анри услубида гол уришга уриниши муваффақиятсиз чиқди. Тўп марказга борди, Райяни эса бундай зарба билан ажаблантириб бўлмасди.

Винисиус Жуниор ҳам ўйин бошида мезбонлар стандарт вазиятдан кейин тўп йўқотганида қарши ҳужумда қочиб кетди, аммо бутсасининг ташқи қисми билан пас йўллаб, жарима майдони марказидаги Мбаппени яккама-якка вазиятга чиқариб юборишга бўлган уриниши муваффақиятсиз якунланди. Амалда, биринчи бўлимда «Реал»нинг қўлидан келгани шу ҳужумлар бўлди, таблода ноллар сақланиб қолиши эса — Куртуанинг хизмати. У 43-дақиқада Райснинг бош билан йўллаган зарбасидан кейин бурчакка қараб кетаётган тўпни тўсди, қайтган тўпга зарба берган Мартинеллига ҳам гол уришга йўл қўймади. Белгиялик посбон иккинчи бўлимда ҳам қаҳрамонлик кўрсатишда давом этди ва Алаба билан биргаликда рақибнинг бир ҳужум давомида йўллаган учта зарбасини (Мартинеллидан яна бир, Меринодан икки уриниш) қайтаришди.

Иккинчи бўлим бошида меҳмонлар тўпни яхшироқ назорат қила бошлагани иллюзия бўлиб чиқди. «Реал»нинг фаоллашиши Мбаппе дарвоза тўрининг ташқи томонига йўллаган зарба билан якунланди, «Арсенал» эса босимни тинимсиз ошириб борди. Сака марказга ҳам кўчиб ўйнаб, меҳмонлар ҳимоясини довдиратишга киришди. Айнан у мадридликлар ҳалокатини бошлаб берган жарима зарбасини ишлади. Райс ажойиб зарба билан «жонли девор»ни айланиб ўтиб, Роберто Карлоснинг машҳур голини ёдга солиб юборди, кейин Сака ишлаган навбатдаги жарима зарбасидан кейин тўпни ақл бовар қилмас йўналишда тўғри «тўққизлик»ка йўналтирди. У 12 дақиқа ичида «Вест Ҳэм» ва «Арсенал» сафида бирор марта қилмаган ишини икки бор уддалади!

Яъни шу вақтгача фаолиятида бирор марта жарима зарбасидан тўпни тўғридан тўғри дарвозага йўлламаган футболчи ЕЧЛ плей-оффида шундай голлар билан дубл қайд этган илк футболчи бўлди. Меринонинг гол уришига эса ҳамма кўникиб бўлган. Қолаверса, «Реал Соседад»нинг собиқ футболчиси учун мадридликлар — севимли рақиб, у бунгача ушбу клуб дарвозасини тўрт бор ишғол этганди. «Арсенал» учун ҳайратланарли оқшом, таркиб танлашда адашган Анчелотти учун эса даҳшатли туш. У футболчиларни алмаштиришда ҳам кечикди, Модрич майдонни тарк этаётганида ҳисоб 2:0 кўринишига келиб бўлганди, мезбонлар кураж ушлаганида эса ўйинда бурилиш ясашнинг имкони бўлмади.

Two special Declan Rice free-kicks 😍
Lautaro golazo 😮‍💨
Merino first-time finish 🎯@Heineken | #UCLGOTD pic.twitter.com/y8YpK7iC1e

— UEFA Champions League (@ChampionsLeague) April 8, 2025

Лондондаги 0:3 ҳисобидан кейин «Реал» фиаскога жуда яқин, жамоа 21 йил ичида илк бор асосий еврокубокни чоракфиналда тарк этиши мумкин. «Қироллик клуби» учун бу энг қулай босқичлардан ҳисобланарди, жамоа сўнгги 17 уринишда фақат 2004 йилда, «Монако» билан тўқнашувлардан кейин бу босқичдан ўтолмаганди. Иккинчи ўйин учун интрига фақат назарий жиҳатдан сақланиб қолмоқда, Артета шогирдлари бир ўйинда иккитадан ортиқ гол ўтказиши яқин вақтларда кузатилмаган.