Ню-Йоркда вертолёт дарёга қулади, олти киши ҳалок бўлди

Йўловчи вертолёти Манҳэттен марказидаги майдончадан ҳавога кўтарилганидан кўп ўтмай Гудзон дарёсига қулаган.

Фото: Видеодан кадр

Ню-Йоркда йўловчи вертолётининг Гудзон дарёсига қулаши оқибатида камида олти киши ҳалок бўлди. Ҳодиса 10 апрел, пайшанба куни тушдан кейин содир бўлган.

ОАВнинг хабар беришича, ҳалокат шаҳар маркази яқинида, 40-пирс ёнида содир бўлган. Ню-Йорк полиция департаменти маълумотларига кўра, вертолёт бортида олти киши бўлган: учувчи, икки катта ёшли йўловчи ва уч нафар бола. Ҳуқуқ-тартибот идоралари маълумотларига кўра, йўловчилар Испаниядан келган сайёҳлар оиласи бўлган.

Вертолётда Siemens Spain директори Аугустин Эскобар, рафиқаси ва уч қизи бўгани айтилмоқда.

Ню-Йорк мэри Эрик Адамснинг сўзларига кўра, кема бортидагиларнинг барчаси ҳалок бўлган деб эълон қилинган.

Ижтимоий тармоқ фойдаланувчилари вертолётнинг Гудзон дарёсига қулагани акс этган видеони жойлаштирди.

Яна бир видеода ҳаво кемаси ҳалокатга учраган пайти тасвирланган. Вертолёт «тартибсиз» учган, деб қайд этади Breaking News янгиликлар агрегатори.

FlightRadar маълумотларига кўра, вертолёт ҳалокатдан олдин 15 дақиқа ҳавода бўлган. FlightRadar таҳлилчиларининг таъкидлашича, у Манҳэттен марказидаги вертолёт майдончасидан парвоз қилган.