Nyu-Yorkda vertolyot daryoga quladi, olti kishi halok bo‘ldi

Yo‘lovchi vertolyoti Manhetten markazidagi maydonchadan havoga ko‘tarilganidan ko‘p o‘tmay Gudzon daryosiga qulagan.

Foto: Videodan kadr

Nyu-Yorkda yo‘lovchi vertolyotining Gudzon daryosiga qulashi oqibatida kamida olti kishi halok bo‘ldi. Hodisa 10 aprel, payshanba kuni tushdan keyin sodir bo‘lgan.

OAVning xabar berishicha, halokat shahar markazi yaqinida, 40-pirs yonida sodir bo‘lgan. Nyu-York politsiya departamenti ma’lumotlariga ko‘ra, vertolyot bortida olti kishi bo‘lgan: uchuvchi, ikki katta yoshli yo‘lovchi va uch nafar bola. Huquq-tartibot idoralari ma’lumotlariga ko‘ra, yo‘lovchilar Ispaniyadan kelgan sayyohlar oilasi bo‘lgan.

Vertolyotda Siemens Spain direktori Augustin Eskobar, rafiqasi va uch qizi bo‘gani aytilmoqda.

Nyu-York meri Erik Adamsning so‘zlariga ko‘ra, kema bortidagilarning barchasi halok bo‘lgan deb e’lon qilingan.

Ijtimoiy tarmoq foydalanuvchilari vertolyotning Gudzon daryosiga qulagani aks etgan videoni joylashtirdi.

Yana bir videoda havo kemasi halokatga uchragan payti tasvirlangan. Vertolyot «tartibsiz» uchgan, deb qayd etadi Breaking News yangiliklar agregatori.

FlightRadar ma’lumotlariga ko‘ra, vertolyot halokatdan oldin 15 daqiqa havoda bo‘lgan. FlightRadar tahlilchilarining ta’kidlashicha, u Manhetten markazidagi vertolyot maydonchasidan parvoz qilgan.