Tesla акциялари хавотирли кўрсаткичгача пасайди

Акциялар нархи янада тушиб кетиш таҳдиди остида қолди.

Фото: AFP

Американинг Tesla компанияси акциялари «ўлим хочи» деб номланувчи хавотирли кўрсаткичга етди, бу эса нархнинг янада пасайишини англатади.

Gizmodo хабарига кўра, бу акциянинг 50 кунлик ҳаракатланувчи ўртача кўрсаткичи (тахминан $289) 200 кунлик ўртача кўрсаткичдан (тахминан $291) пастга тушганда содир бўлди. Бу ҳолат Tesla акцияларида 2022 йил май ойидан бери кузатилмаган эди.

Трамп маъмуриятининг янги тарифлари ва компания бош директори Илон Маск хатти-ҳаракатларига қарши норозиликлар туфайли бозорда юз берган беқарорлик акциялар нархига салбий таъсир кўрсатди. Жумладан, Tesla акциялари 2025 йил бошидан бери ўз қийматининг учдан биридан кўпроғини йўқотди.

Таъкидланишича, федерал ҳукумат ислоҳотларида фаол иштирок этаётган Маск баъзи инвесторларни ғазаблантирди. Оқ уй олдидаги Cybertruck рекламаси каби қисқа муддатли муваффақиятларга қарамай, Tesla обрўсига путур етди.

«Ўлим хочи» Tesla учун ноёб эмас: S&P 500 ва Nasdaq 100 индекслари ҳам бозорнинг умумий ўзгарувчанлигини акс эттирувчи ушбу кўрсаткични қайд этди. Мутахассисларнинг огоҳлантиришича, индикатор ҳар доим ҳалокатни англатмайди, лекин эҳтиёткорлик талаб қилади.

#Tesla #фонд бозори