Россия ИИВ мактаблардаги мигрант болаларнинг рўйхатини юритишни бошлайди

Россиянинг минтақавий ҳукуматлари мактабга қабул қилиш жараёнида мигрант болаларни тестдан ўтказиш, уларни ўқишга қабул қилиш ва четлаш ҳақида Ички ишлар вазирлигига маълумот беришга мажбур бўлади. Бу ҳақда Миграция вазирлиги томонидан ишлаб чиқилган қонун лойиҳасида сўз боради.

Ҳужжатга кўра, минтақавий таълим вазирликлари ва департаментлари ИИВнинг ҳудудий органларига бола ва унинг ота-онасининг исми-шарифи, туғилган санаси, шахсни тасдиқловчи ҳужжатлари, яшаш манзили, суғурта рақами ҳамда уларнинг индивидуал шахсий ҳисоб рақамлари ҳақидаги маълумотларни тақдим этади. ИИВ органлари эса ўз навбатида, мигрант болаларнинг рўйхатга олиниши ва рўйхатдан чиқарилиши ҳақида маълумотларни минтақавий ҳокимиятларга юборади. Қонун лойиҳаси изоҳида айтилишича, ушбу маълумот алмашинуви болаларни «Россия жамиятига мослаштириш ва интеграция қилиш»га қаратилган. Идора, шунингдек, ушбу механизм орқали мактабга қабул қилинмаган мигрант болаларни аниқлаб, уларнинг умумий таълим олиш ҳуқуқини таъминлашга ёрдам беради.

Қонун лойиҳасининг молиявий-иқтисодий асосига кўра, ИИВнинг ахборот тизимини янгилаш учун 125 миллион рубл ажратилиши кўзда тутилган. «Россия Федерациясидаги хорижий фуқароларнинг ҳуқуқий мақоми тўғрисида»ги ва «Хорижий фуқаролар ва фуқаролиги бўлмаган шахсларнинг миграцион ҳисобга олиниши тўғрисида»ги федерал қонунларга ўзгартиришлар киритилади.

Россия юристлар ассоциацияси бошқаруви раиси Владимир Груздевнинг таъкидлашича, янги механизм ИИВга Россияда ноқонуний асосда яшаётган вояга етмаган хорижий фуқароларни аниқроқ ҳисобга олиш имконини беради. Март ойида Россия президенти Владимир Путин ИИВ коллегияси йиғилишида ноқонуний миграция каналларини йўқ қилиш ва миграцияни назорат қилишнинг замонавий воситаларидан фаолроқ фойдаланишни талаб қилганди.

Россияда 1 апрелдан мигрант болаларнинг рус тилини билиш даражасини аниқлаш бўйича тест қилиш бошланган. Биринчи синфга кираётган болалар тинглаш, гапириш ва сўз бойлигини кўрсатиши керак. Иккинчи синфга кираётганлар эса минимал даражадаги ўқиш ва ёзиш кўникмаларини намойиш қилиши лозим. Синф даражаси ошгани сайин тестлар мураккаблашади. Минимал ўтиш балли — уч («қониқарли»). Агар бола ушбу баллни тўплай олмаса, уч ойдан сўнг тестни қайта топшириш ва рус тилидан қўшимча дарс олиш таклиф қилинади.

Эслатиб ўтамиз, апрел бошларида Россияда Фуқаролик ва чет эл фуқароларини рўйхатга олиш масалалари бўйича хизмат ташкил этилганди. Янги хизматнинг асосий вазифаси — «миграция жараёнларини тартибга солиш ва мигрантларнинг Россия қонунларига риоя қилишини таъминлаш, шунингдек, ноқонуний фаолиятни камайтиришга йўналтирилган чора-тадбирларни амалга оширишдан иборат».