Рубио: Музокаралардан воз кечиш ёки кечмаслигимизни тез орада ҳал қиламиз

Қўшма Штатлар урушни тугатиш учун Украина ва Россия билан тезроқ тинчлик келишувига эришмоқчи. Акс ҳолда, давлат котиби Марко Рубио сўзларига кўра, Вашингтон музокаралар жараёнидан чиқиши мумкин. «Бу ҳафта жуда муҳим бўлади, — деди у 27 апрел, якшанба куни NBC телеканалига берган интервьюсида. «Бу ҳафта биз ушбу лойиҳада иштирок этишни хоҳлаймизми ёки бир хил даражада, балки ундан ҳам муҳимроқ бўлган бошқа масалаларга эътибор қаратиш вақти келдими, деган қарорга келишимиз керак».

Шу билан бирга, АҚШ Давлат департаменти раҳбари Киев ва Москва билан келишувга эришиш учун қанча вақт қолгани ҳақидаги саволга аниқ жавоб бермади. Муайян санани белгилаш «аҳмоқлик», деди у.

Эҳтимолий келишув масаласига тўхталиб, Рубио ҳали мақсадга эришилмаганини тан олди. «Оптимизм учун сабаблар бор, лекин, албатта, реалист бўлиш керак. Биз яқинмиз, лекин етарлича яқин эмасмиз», — деди у. «Қўшма Штатлар бу лойиҳага вақт ва ресурсларни сарфлашда давом эта олмайди, у муваффақиятга эриша олмайди», деди Давлат департаменти раҳбари.

АҚШ давлат котибига кўра, Вашингтон дипломатик каналлар очиқ қолиши учун Россияга қарши санкциялар киритишга шошилмади. Бироқ Марко Рубио келишувга эришилмаса, АҚШ тинчликни истамаганларга қарши чора кўриш имкониятига эга эканлигини таъкидлади.