“Моно-марказларда ўқитилган 74 минг киши иш билан таъминланмаган” – депутат

Камбағалликни қисқартириш ва бандлик вазирлиги томонидан бажарилган ишларда камчилик ва муаммолар аниқланган. Бу ҳақда парламент йиғилишида депутат Анвар Темиров айтиб ўтди.

“Вазирликнинг асосий функцияси аҳолини иш билан банд қилиш, камбағалликдан олиб чиқиш бўлади. Ҳисоботда келтирилган рақамлар бунинг аксини кўрсатяпти. Касб-ҳунарга ўргатадиган моно-марказларда ўқитилган фуқароларнинг 74 минг нафарга яқини (30 фоизи) иш билан таъминланмасдан қолган. Бундан ташқари, бюджет маблағлари самарасиз мақсадларга сарфланган. Аҳоли ўқитиляпти-ю, лекин иш билан таъминламай қоляпти ёки бўлмаса керакли касбга ўргатилмаяпти. Бунинг энг қизиқ жой шундаки, баъзи туманлардаги марказлар режани тўлдириш билан банд. Аксинча, булар касбга ўргатиш ва иш билан таъминлашни мақсад қилиши керак. Режа тўлдириш учун давлат бюджетидан пул сарфламаслик зарур. Нега вазирлик ўзининг энг қуйи қатламигача ислоҳотни тўлиқ етказиб бормаган? Вазирлик режа тўлдириш билан овора бўлса, эртага аҳоли олдида давлат раҳбари олиб бораётган ислоҳотларига тескари ёндашув бўлиб қолишидан қўрқмайдими? Нега шунча ажратилаётган маблағлардан самарасиз фойдаланилди, нима учун шу кунгача бунинг олди олинмади? Эртага депутатлар ҳудудларга чиқса, фуқаролар олдида жавобгарлигимиз бор, улар савол берганда жавоб беришимиз керак”, деган Анвар Темиров.

Бандлик вазири ўринбосари Сирожиддин Бобоқулов депутатнинг саволига жавобан оила учун татбиқ қилинадиган касблар режали ўқув дастуридан чиқарилганини билдирди. 

“Президентнинг 2024 йил 4 октябрдаги қарорига асосан вазирлик ҳузуридаги касбий кўникма мактаблари сони 75 тадан 65 тага мувофиқлаштирилди. Ўтказилган таҳлиллар натижасида 2022, 2023 йиллар ва 2024 йилнинг дастлабки олти ойида касб-ҳунарга ўқитилганларнинг 30 фоизи бандлиги таъминланмай қолган. Уларнинг асосий қисмини ошпазлик, қандолатчилик ва тикувчилик касбларига ўқитилганлар ташкил қилади. Ишга жойлашмаганларнинг аксарияти хотин-қизлар бўлган. Улар орасида турмушга чиқиб кўчиб кетганлар, уйда бола парвариши билан бандлари, олинган кўникмаларни даромад келтирувчи ишларга эмас, балки ўз оиласи учун татбиқ қилганлари аниқланди. Бугунги кунга қадар вазирлик тизимида ўқитиш жараёни янгиланди”, деган вазир ўринбосари.

Сирожиддин Бобоқуловнинг қўшимча қилишича, оила учун татбиқ қилинадиган касблар режали ўқув дастуридан чиқарилган. Ушбу йўналишларга фақатгина иш берувчи талабига асосан, яъни иш жойи аниқ бўлгандан сўнг ўқитиш бошланади.