Ўзбекистон ва Эрон имтиёзли савдо битими бўйича товарлар рўйхатини келишиб олди

Теҳронда бўлиб ўтган ҳукуматлараро учрашувда Ўзбекистон ва Эрон ўртасида кўп йиллардан бери ечимини кутаётган транспорт-логистика масалаларини зудлик билан ҳал этиш лозимлиги таъкидланди.

Фото: Ўзбекистон бош вазирининг матбуот хизмати

Ўзбекистон бош вазири Абдулла Арипов 11 май куни Теҳронда Эрон биринчи вице-президенти Муҳаммад Ризо Ореф билан музокара ўтказди.

Томонлар ўзаро савдони 2 миллиард долларга чиқариш имкониятларини муҳокама қилди, дея хабар бермоқда Ўзбекистон ҳукумати матбуот хизмати.

Қайд этилишича, расмий Тошкент транспорт-логистика соҳасида кўп йиллардан бери ечимини кутаётган масалаларни зудлик билан ҳал этиш лозим деб ҳисоблайди.

Учрашув якунида қуйидаги ҳужжатлар имзоланди:

Ўзбекистон ва Эрон ўртасида ҳар томонлама ҳамкорликни мустаҳкамлаш бўйича 2025-2027 йилларга мўлжалланган “Йўл харитаси";
Имтиёзли савдо битимининг товарлар рўйхатини тасдиқлаш баённомаси;
Ўсимликлар ҳимояси ва карантини соҳасида ҳамкорлик тўғрисидаги англашув меморандуми;
“Ҳалол” стандарти соҳасида ҳамкорлик тўғрисидаги англашув меморандуми.

Эслатиб ўтамиз, 2025 йил 25 февралдан бошлаб Ўзбекистон ва Туркманистон ўртасида эркин савдо режими амал қила бошлаганди.