Умра лицензияси берилган турфирмалар сони 2 тага кўпайди

Дин ишлар бўйича қўмита Умра тадбирларини ўтказиш бўйича танлов натижаларига кўра яна 2 та турфирмага лицензия берди. Шу тариқа, «Зиёрат» жамғармасига миллион доллар захира қўйиб, одамларни Умрага юбориш учун қонуний рухсат олган хусусий ташкилотлар сони 14 тага етди.

Фото: Kun.uz

Дин ишлари бўйича қўмита 15 май куни Умра тадбирларини ташкил этиш ва ўтказиш фаолиятини амалга ошириш учун якка тартибдаги лицензия бериш бўйича танлов натижаларига кўра яна 2 та тур фирмага лицензия берди.

Хусусан, танлов комиссияси Тошкент шаҳрида жойлашган «Centrum holidays» МЧЖ ҳамда Бухорода жойлашган «Buxoro umra jamiyati» МЧЖларини танлов ғолиби деб топган.

Дин ишлари бўйича қўмита жорий йил 7 март куни иккинчи маротаба Умра лицензиясини олиш учун тадбиркорлик субъектларидан янги аризалар қабули бошланганини эълон қилган эди.

Kun.uz манбаларига кўра, лицензияловчи ваколатли органга 10 дан ортиқ ариза келиб тушган, лекин қўмита уларнинг фақат 2 тасига лицензия берган. Ушбу маълумотни Дин ишлари бўйича қўмита билан боғланиб, аниқлаштиришнинг имкони бўлмади. Давлат ташкилотининг расмий сайтида кўрсатилган рақамлар жавоб бермаяпти. Дин ишлари бўйича қўмита янги лицензия учун танлов эълон қилинганини ҳам, унинг натижаларини ҳам кенг аҳоли фойдаланадиган ижтимоий тармоқлардаги расмий саҳифаларида эълон қилмади.

Айни вақтда Ўзбекистонда Умра зиёратини ташкил қилиш учун лицензия берилган турфирмалар сони 14 тага етди (рўйхат).

Эслатиб ўтамиз, ўтган йиллар давомида Ўзбекистонда юзга яқин турфирма Умра хизматларини кўрсатиш ҳуқуқига эга эди. Аммо лицензия олиш қийинлаштирилиши, хусусан, 1 млн долларлик захира талаби киритилганидан кейин бу хизматни кўрсатувчилар сони кескин қисқарган. Хусусан, 2024 йил ноябрь ойида Умра зиёратини ташкил қилиш учун атиги 12 та турфирмага лицензия берилди.

Аввалроқ, Дин ишлари бўйича қўмита раиси Содиқжон Тошбоев Умра лицензиясининг янги шартлари ҳақида гапириб, бу монополия эмаслиги ва 1 миллион доллар катта миқдор эмаслигини айтган эди.

Қўмита аввалроқ, ўтказилган текширувларда «Умра» лицензиясига эга бўлмасдан, ушбу хизматни кўрсатаётган 31 та сайёҳлик фирмаси масъулларига жиноий иш очилгани, фаолиятини лицензиясиз амалга оширган турфирмаларга 75 миллион сўмдан жарималар қўлланганини айтган эди.

#лицензия #Умра