Ўзбекистонлик жангарилар Сурияда Россия ҳарбий базасига ҳужум қилди – ОАВ

Россия ҳарбийлари Суриядаги авиабазада тўрт нафар худкуш-террорчининг ҳужумини қайтарди. Бу ҳақда отишма лаҳзаси акс этган видеони эълон қилган Mash хабар берди.

Нашр маълумотларига кўра, ҳужум 20 май куни эрта тонгда Хмеймим ҳарбий авиабазаси яқинида содир бўлган. Жангарилар хавфсизлик постлари орқали ҳарбий объектга бостириб киришга уринган, бироқ россияликлар уларга қаршилик қилган.

Отишма оқибатида уч нафар жангари йўқ қилинган, яна бири қочиб кетган. Унга танкка қарши граната отиш мосламаси (РПГ) билан зарба берилган, аммо унинг муваффақиятли бўлган-бўлмагани ҳозирча номаълум.

Қайд қилинишича, жангариларнинг шахси аллақачон аниқланган. Дастлабки маълумотларга кўра, уларнинг барчаси Ўзбекистондан келган ва Суриянинг янги ҳукуматини тан олмайди.

Хмеймим ҳаво базаси Россия томонидан фойдаланиладиган Сурия ҳаво базаси ва Россия ҳарбий контингентининг мамлакатдаги асосий базаси бўлиб, у ерда Россия Аэрокосмик кучларининг авиация гуруҳи жойлашган. Базанинг ҳуқуқий мақоми Россия ва Сурия ўртасида 2015 йил августида имзоланган келишув билан тартибга солинади.