Австрияда иккита йўловчи поезди ноодатий тўқнашиб кетди

12 февралда Австриянинг Никласдорф коммунасида иккита йўловчи поезди тўқнашиб кетди. Бу ҳақда Steiermark-News нашри маълум қилди. 

Нашр маълумотларига кўра, фавқулодда ҳодиса оқибатида камида бир киши ҳалок бўлган, 22 киши, жумладан 3 бола жароҳат олган. Уларнинг барчаси шифохоналарга етказилган. 

Таъкидланишича, номаълум сабабга кўра иккита қўшни изда бир-бирига қарама-қарши ҳаракатланаётган поездлар бурилишда ён томонидан тўқнашиб кетган. Бунинг оқибатида поездлардан бири рельслардан чиқиб кетган. Тафсилотлар аниқлаштирилмоқда. 

Полицияда маълум қилинишича, поездлардан бири халқаро экспресс поезд (EuroCity) бўлиб, Австриянинг Грац шаҳридан Германиянинг Саарбрюккен шаҳрига кетаётган бўлган. Иккинчи поезд эса шаҳар ташқарисига қатновчи электричка бўлган. Айни вақтда воқеа жойида қутқарувчилар иш олиб бормоқда, линия бўйича қатнов тўхтатилган.