Америкалик комик Трампни “лақиллатди” 

Америкалик стендап-комик Жон Мелендес ўзини АҚШ Демократик партиясидан сенатор Роберт Менендес деб таништириб, АҚШ президенти Дональд Трамп билан қўнғироқлаша олган.  

“ОАВ мен президентни алдаб, у билан биринчи рақамли бортда бўлганда боғлана олганимга эътибор қаратмаётгани таажжублидир”, деб ёзган комик твиттерда.

Fox News телеканалининг хабар қилишича, Мелендес Оқ уй операторларига президент билан қонун лойиҳаси бўйича зудлик билан гаплашиши кераклигини айтган. Бироз вақт ўтиб унга Трампнинг куёви ва маслаҳатчиси Жаред Кушнер қўнғироқ қилиб, Трампни улаб берган.

Мелендес бир неча дақиқа давомида Трамп билан иммиграция сиёсати ва АҚШ олий суди билан боғлиқ вазиятни муҳокама қилган. Трамп суҳбат давомида сенаторга қарши коррупция иши олиб борилганини ёдга олиб, уни оқлангани билан табриклаган. 

Комик Трамп билан суҳбати аудиоёзувини интернетда жойлаштирган.

Politico нашрининг маълум қилишича, Оқ уйда пранкер қандай қилиб президент телефон линиясига улана олгани аниқлаштирилмоқда.