Индонезияда қулаган Boeing  «қора қутиси»дан сигнал яхшилангани маълум қилинди

Индонезия Транспорт хавфсизлиги бўйича қўмитаси бошлиғи ўринбосарининг маълум қилишича, денгизга қулаган Boeing 737 MAX 8 «қора қутиси» деб ҳисобланаётган объектдан кетаётган сигнал анча яхшиланган. Бу ҳақда Reuters хабар бермоқда.

29 октябрь куни Lion Air авиакомпаниясининг Boeing 737 йўловчи самолёти Жакарта аэропортидан парвоз қилгач ҳалокатга учради. Самолёт парвозга чиққанидан кейин тахминан ўн дақиқа ўтиб радарлардан йўқолиб қолган. Индонезияда ҳалокатга учраган самолёт бортида 189 киши бўлган.

«Ҳалокатга учраган Boeing’нинг «қора қутиси»дан келаётган сигнал товуши анча яхшиланган», - дея хабар берди амалдор.

Шунингдек, унинг айтишича, расмийлар самолёт парчаларини қидириш учун масофадан бошқариладиган сув ости аппаратидан фойдаланишмоқда. Унинг қўшимча қилишича, ҳозирги вақтда денгиз тубида Boeing корпусининг «катта қисми» топилган. 

Эслатиб ўтамиз, аввалроқ Индонезияда ҳалокатга учраган Boeing’нинг эҳтимолий парчалари топилгани хабар қилинганди.