Куальярелла Батистутанинг рекордини такрорлади. У А Серияда яққол тўпурар

«Сампдория» ҳужумчиси Фабио Куальярелла Италия чемпионатининг жорий мавсумида асосий юлдуз бўлиб турибди. У А Сериянинг 21-турида собиқ клуби «Удинезе» дарвозасига пенальтидан иккита гол урди ва яна бир голга узатма берди (4:0).

Энди у ўтган асрнинг 90-йилларида «Фиорентина» сафида тўп сурган аргентиналик футбол афсонаси Габриэль Батистутанинг рекордини такрорлади: Батигол ҳам 1994 йили Италия чемпионатида қаторасига 11 ўйинда гол урганди.

Шу ҳафтада 36 ёшга тўлган Фабио айни вақтда А Серия тўпурарлари рўйхатида биринчи ўринга чиқиб олган, унда 16та гол, иккинчи ўриндаги Криштиану Роналду («Ювентус») ва Дуван Сапата («Аталанта») ҳисобида 14тадан гол бор.

Қайд этиш керакки, Куальярелла ўтган мавсумда ҳам тўпурарлик салоҳиятини намойиш этганди, у А Сериянинг 35 учрашувида 19та голга муаллифлик қилган.

У чемпионатнинг кейинги турида ўзининг собиқ жамоаси «Наполи»га гол урса (у 2010 йилда маиший муаммолари туфайли Неаполдан Туриннинг «Ювентус»ига ўтишга мажбур бўлганди), тарихий рекорд соҳибига айланади.