Бразилиянинг собиқ президенти турмадан вақтинча чиқарилди 

Ҳозирда коррупция айблови билан қамоқда жазо ўтаётган, Бразилиянинг собиқ президенти Луис Инасиу Лула да Силвага набирасиниг вафоти туфайли қамоқни вақтинча тарк этишига рухсат берилди. 

Сиёсатчининг олти набирасидан бири, 7 ёшли Атур Араужо Лула да Силва 1 март куни касаллик оқибатида вафот этган. Собиқ президент набирасининг дафн маросимида иштирок этишни сўраган ва унинг илтимоси қондирилган.

Маълум қилинишича, собиқ президент Сан-Паулу штатидаги қабристонга қўриқчилар ҳамроҳлигида келган.

Бир ойча аввал маҳбусга вафот этган укаси билан видолашишга рухсат беришмаган. Ўшанда суд идоралари собиқ президентга дафндан кейинги оилавий учрашувда иштирок этишга рухсат берган, бироқ Лула да Силва турмада қолишга қарор қилган.

Лула да Силва Бразилияга 2003 йилдан 2011 йилгача президентлик қилган. У 2016 йилда бошқа бир коррупция ва пул ювиш иши бўйича 9,5 йиллик қамоқ жазосига тортилган

2018 йил январда олий суд унинг қамоқ жазосини 12 йил 1 ойгача узайтирган. Собиқ президент 2018 йил апрелда Куритиба шаҳридаги турмада жазони ўташни бошлаган.

2019 йил февралда эса унинг қамоқ муддатига яна 13 йил қўшиб берилган.

Умумий ҳисобда Лула Да Силвага қарши 7 та жиноий иш очилган. Сиёсатчи улардан бири бўйича оқланган.