ИИББ: парда ва дарпардалар бўйича қонунчиликда ўзгаришлар рўй бермади 

Тошкент шаҳар ИИББ туси ўзгартирилган (қорайтирилган) транспорт воситаларидан фойдаланиш масаласига оид қонунчилик юзасидан изоҳ билан чиқди.

Қайд этилишича, автомобилларнинг орқа ойналарини тусини ёруғлик ўтказувчанлигини чегараламасдан ўзгартириш рухсат этилади.

Шунингдек, туристик транспорт сифатида лицензияга эга бўлган М3 тоифа III класс автотранспорт воситалари ойналарининг ҳам тусини қорайтириш мумкин.

Туристик автобусларни ён ойналарини қорайтириш масаласида рухсат нархи қуйидаги омилларни инобатга олган ҳолда белгиланади: автобус юридик шахси рўйхатга олинганлиги; кимга тегишлилиги; Ўзбекистон, ёки бошқа давлат ҳудудида рўйхатда туриши.

Маълум қилинишича, парда, дарпарда, жалюзилар бўйича қонунчиликда ўзгаришлар рўй бермади. Енгил автомобиллар билан боғлиқ ҳолларда пардаларни ён кўзгулар мавжуд бўлган ҳолда фақатгина орқа ойнага ўрнатиш мумкин. Ён ойналарга пардалар ўрнатиш фақатгина М3 тоифадаги III класс автотранспорт воситаларига мумкин (ҳайдовчи ўриндиғидан ташқари саккизтадан ортиқ ўриндиқлари бўлган ва оғирлиги 5 тоннадан ошиқ бўлган йўловчи транспорти). 

Шунингдек, автомобиль олд ойнасининг 14 см.дан кўп бўлмаган тепа қисми тусини полоса шаклида ёруғлик ўтказувчанлиги чегараламаган даражада ўзгартириш, илгаригидек рухсатномасиз амалга оширилади.

Бундан олдин, «тонировка» бўйича ҳукумат қарори қабул қилингани, янги нархлар белгилангани хабар берилганди.