Италияда Турин дербиси, «Тоттенҳэм» яна Ливерпулда меҳмон. Ҳафта ўйинлари анонси

Пайшанба куни Испания ва Италияда навбатдаги тур, Германия, Англия ва Францияда эса, кубок ўйинлари бўлиб ўтди. Жумадан эса навбатдаги турга ҳам старт берилди. «ПСЖ» кутилмаганда «Дижон»га ютқазиб улгурди.

 Агар дам олиш кунларидаги бўш вақтимизни футбол билан ўтказмоқчи бўлсак, бу сафар ҳам бизни бир қатор қизиқарли баҳслар кутиб турибди. Ёмон хабар шундаки, Европада соат сурилди, энди ўйинларни одатдагидан бир соат кечроқ кўришга мажбурмиз.

БОРУССИЯ Д – ВОЛЬФСБУРГ (2 ноябрь, 19:30)

Бундеслига турнир жадвалининг юқори қисмида жуда зич ҳолат юзага келган. Масалан, 10-ўринда бораётган «Айнтрахт» пешқадам жамоадан атиги 5 очко ортда холос. Ҳаммамиз топ жамоалар кўплигини айтадиган Англияда ҳам ҳатто, биринчи ва иккинчи ўринлар ўртасидаги фарқ олти очкони ташкил қилиб турибди. Германиядаги бу ҳолат кучли жамоаларнинг кўпайганиданми ёки барқарор жамоалар йўқлигиданми, ҳозирча айтиш қийин.

Лекин мана шундай талотўпда ҳам ҳали бирор марта мағлубиятга учрамаган жамоа борлиги ҳам қизиқ – «Вольфсбург». «Бўрилар» кўп дуранг ўйнашди, аммо ҳимоя чизиғи бўйича ҳам лигада етакчилик қилишмоқда. 9 ўйиндан атиги 5 марта ўз дарвозасидан гол ўтказган «Вольфсбург»ни энди Дортмунд клуби синовдан ўтказади. Ўзаро ўйинлар борасида «Боруссия» «Вольфсбург» учун энг ноқулай рақиб – сўнгги 8 ўйиннинг 7тасида «асаларилар» ғалаба қозонган, бир ўйин дуранг билан якунланган. Шунингдек, охирги беш ўйинда ҳатто «Вольфсбург» бирорта ҳам гол ура олмаган. Лекин жамоаларнинг бугунги ҳолати, турнир жадвалида қўшни эканликлари учрашувни янада аҳамиятлироқ, қизиқроқ қилса керак.

Жароҳатлар борасида, ниҳоят «Боруссия» анча ўзига келиб олди. Шмелцердан бошқа барча футболчилар курашга тайёр, лекин уч кундан кейин «Интер»га қарши жуда муҳим ўйин кутиб турганини эътиборга олсак, Фавр ақлининг бир чеккасида ўша ўйин ҳақида ҳам ўйлаши ва маълум ротациялар қилишга ҳаракат қилиши ҳам турган гап. Меҳмонларда эса, шундоқ ҳам муаммолар етарли – биратўла таркибнинг етти футболчиси сафдан ташқарида. Булар ичида Меҳмеди, Гинчек каби етакчилар ҳам бор. Дарвозабон Кун Кастелс эса, яна машғулотларни бошлади ва балки сафга қайтиши ҳам мумкин.  

РОМА – НАПОЛИ (2 ноябрь, 19:00)

Италияда бу сафар ажойиб тур бўлади. Турин дербисидан ташқари, топ-6 дейиш мумкин бўлган яна тўрт жамоа ўзаро куч синашадилар. «Рома» ҳам, «Наполи» ҳам, ҳозирча чемпионлик учун даъвогар ҳисобланишмаса-да, Чемпионлар лигаси йўлланмаси учун тўғридан-тўғри рақобатчилар деб аташ мумкин.

Ҳафта ўртасидаги ўйинлар айнан мана шу кучли тўртликдаги ўринни «Рома» «Наполи»дан тортиб олиши билан якунланди. Римликлар сафарда чиройли ғалабага эришган бўлишса, «Наполи» «Аталанта»га қарши принципиал учрашувнинг сўнгги дақиқаларида ғалабани бой берди. Бу эса, Анчелотти жамоасининг А Сериядаги сўнгги тўрт ўйиндаги учинчи дуранги эди. Йўқотилган олти очко «Наполи»ни бемалол пешқадамлар қаторига киритиши мумкин эди. Энди эса, оғир ой бошланди – неаполликлар ноябрнинг ўзида «Рома», «Милан» ва «Ливерпуль» жамоалари стадионида меҳмон бўлишади. Бундай тақвим билан ҳам Серия, ҳам Лигадаги имкониятни сақлаб қолиш осон бўлмайди.

«Рома» эса яхши спорт формасига кириб олди, беш ўйиндан бери мағлубиятсиз келмоқда, уч ўйинда, жумладан, «Милан»га қарши ўйинда ғалабага эришилди. Айниқса, Удинезедаги ўйинда деярли бир соат камчилик бўлиб ўйнаб ҳам, йирик ҳисобда ғалаба қозониш эътирофга лойиқ. «Рома» ўн киши ҳолатда 1:0 ҳисобидаги устунликни 4:0га айлантира олди.

Лекин «Рома» «лазарети» ҳамон яхши футболчилар билан тўла. Заппакоста, Мхитараян, Пеллегрини, Калинич каби футболчилар ҳали тиклангани йўқ. Уларнинг сафига эса, Удинеда четлатилган Фасио қўшилди, у дисквалификация туфайли муҳим ўйинни ўтказиб юборади. Меҳмонлар сафида эса, Элсаид Хюсайнинг майдонга тушиши сўроқ остида турибди.

Дарвоқе, рақибларнинг Римда бўлиб ўтган охирги уч ўйинида «Наполи»нинг қўли баланд келганини таъкидлаш керак. Хусусан, шу йилнинг март ойида бўлиб ўтган охирги тўқнашув 4:1 ҳисобида меҳмонлар фойдасига ҳал бўлган. Қизиғи, «Наполи» ўз уйида «Рома»ни тўрт мавсумдан бери юта олмаяпти. Сўнгги йилларда қайсидир маънода меҳмонлар устунлик қила оладиган жуфтлик ҳосил бўлибди, десак ҳам бўлади.

СЕВИЛЬЯ – АТЛЕТИКО (2 ноябрь, 22:30)

Юқорида айтиб ўтганимиз, Бундеслигадаги ҳолатга ўхшаш вазият Испанияда ҳам кузатилмоқда. Биратўла 8-9 жамоа юқори ўринлар учун даъвогар сифатида таърифланиши мумкин бемалол. Масалан, бу турда тўқнаш келадиган «Севилья» ва «Атлетико»да бир хил – 20тадан очко бўлиб, пешқадам «Барселона»дан 2 очко кам жамғаришган, холос. Демак, бу ўйинда ғалаба қозонган жамоа вақтинча бўлса ҳам, турнир жадвалини бошқариши мумкин. Мағлубият эса, ҳатто уларни еттинчи ўринга ҳам тушириб юбориши мумкин.

«Атлетико» мавсум олдидан «Реал» дарвозасига 7 гол урганда ва илк турларда юз фоизлик натижа кўрсатаёганда, Симеоне ўзининг навбатдаги машинасини яратди, деганлар ҳам кўпчилик эди. Аммо айниқса, ҳужум чизиғида муаммолар пайдо бўлди, «Атлетико» рақибни бутунлай маҳв этиш йўлларини топа олмаяпти, натижада жуда кўп дуранглар қайд этиляпти. Жамоа саккиз ўйиндан бери мағлуб бўлмаса-да, бу ўйинларнинг 5таси дуранг билан якунланган. «Алавес», «Вальядолид», «Сельта» каби жамоаларга қарши ўйинларда, «Атлетико» одатда бемалол ғалаба қозониб, ўрганиб қолганди. Энди эса, Фелиш ҳам жароҳат олди ва усиз ҳужум чизиғи янада ғариб кўриниши табиий.

«Севилья» эса «Камп Ноу»даги 0:4дан кейин ўзига келиб олди. Ўз майдонидаги қаторасига уч ўйинда (бири Европа Лигасида «Дюделанж» билан) ғалабага эришди. «Валенсия»га қарши қийин сафар ўйинида дуранг қайд этди. Хуллас яхши спорт формасига кириб олган андалусияликлар бу турдан сўнг учинчи ўринга мустаҳкам жойлашиб олишлари мумкин.

Ўтган мавсумда ҳар икки ўйин ҳам 1:1 ҳисобида якунланган. Иккала ўйин ҳам бир хил сценарийда ўтиб, мезбонлар ҳисобни очгач, ғалабани қўлдан чиқаришган. Ундан олдинги йил эса «Севилья» икки ғалаба билан «Атлетико»ни Қироллик кубогидан чиқариб юборганди.

ТОРИНО – ЮВЕНТУС (3 ноябрга ўтар кечаси, 00:45)

Шундоғам, Турин дербиси ҳар йили бундай анонсларимиз назаридан четда қолмаса-да, бу сафарги дерби янада қизиқарлироқ кечиши мумкинлигидан далолатлар кўп. Масалан, «Ювентус» турнир жадвалини бошқариб турган бўлса-да, устунлик ҳар доимгидек эмас, туринликлар ўз ўйинларини катта қийинчиликлар билан қутқариб қолишяпти. Эришилган 8 ғалабанинг 7таси кичик ҳисобда қўлга киритилган, охирги тўрт ғалаба бир хил 2:1 ҳисобида қайд этилган. Яъни ҳам ҳимояда, ҳам ҳужум чизиғида «Ювентус» мукаммал кўринмаяпти, айниқса, «Торино» каби жамоалар бемалол камида бир очко учун ҳаракат қилишлари мумкин.

Икки фронтда кураш «Торино»га қийинчилик туғдиргани шубҳасиз. Европа Лигасидаги саралаш босқичлари туфайли, мавсумга одатдагидан эрта кириб келган «Торино» чемпионат ўйинларида қийналиб қолмоқда. Жамоа турнир жадвалининг иккинчи ярмига тушиб кетган. Аммо ўтган йилги тажриба «Торино»га айнан кучли рақиблар билан муносиб курашиш кўникмасини ҳосил қилгани ҳам факт. Бу йили улар «Мила»ни енгишди, «Наполи» билан сафарда дуранг ўйнашди. Ҳатто «Аталанта»нинг ягона мағлубияти ҳам айнан «Торино» билан ўйинда рўй берган. Сўнгги турда «Лацио»дан йирик мағлубият эса, кўпроқ, иккинчи бўлимда Нкулунинг қизил карточка олгани билан ҳам боғлиқ. А Сериядаги сўнгги беш ўйинида ғалаба нима билмаётган «Торино» ўзининг бурилиш нуқтаси сифатида айнан дербини танлаган бўлса, ажаб эмас. «Олимпико Гранде Торино» стадионидаги охирги тўрт ўйинда «Ювентус»нинг қўли баланд келган. Аммо «Ювентус» майдонидаги сўнгги ўйин 1:1 ҳисобида тугаганини ҳам таъкидлаш лозим.

«Ювентус» сафида ушбу ўйинда Кьеллини, Игуаин, Перин, Пьянич жароҳат туфайли, Рабьо эса, дисквалификация туфайли ўйнай олишмайди. Шунингдек, келаси ҳафта ЕЧЛда Москвага сафар кутиб тургани учун Сарри яна баъзи ротацияларга қўл уриши мумкин. Мезбонлар сафида эса, юқорида тилга олинган Николя Нкулуда дисквалификация бор. Томас Ринконнинг ўйинда қатнашиши сўроқ остида қолмоқда. 

ЭВЕРТОН – ТОТТЕНҲЭМ (3 ноябрь, 21:30)

«Манчестер Юнайтед» сал бўлса-да, ўзига келиб, ниҳоят ғалаба қозонишни бошлагач, энди барча эътибор «Тоттенҳэм»га қаратилиши эҳтимоли бор. Почеттино шогирдлари сўнгги беш ўйиндан атиги биттасида ғалаба қозонди. Уч ўйинда мағлубият қайд этилди. Шу орқали Лига кубогида учинчи лига жамоасига имконият борй берилди. «Ливерпуль»га қарши ўйинда лондонликлар очкога яқин келган бўлсалар-да, ўйин тўлиқ ливерпулликларнинг устунлиги остида ўтди, деб бемалол айтиш мумкин. «Тоттенҳэм» 10 ўйиндан кейин 12 очко тўплаб, хавфли зонадан атиги 4 очко юқорида жойлашган ҳолатда яна бир қийин сафарни кутиб турибди.

«Эвертон»нинг аҳволи янада ачинарли. Жамоа таркиби трансфер дарчасида яхшигина тўлдирилди. Таркибда Бернард, Дин, Шнайдерлин, Уолкотт, Гомиш, Кин, Дельф, Ивоби каби топ-клублар ва еврокубокларнинг ҳавосини олган футболчилар бўлса-да, айниқса сафар ўйинларида бутунлай иложсиз кўринмоқда. «Эвертон» бу йил АПЛда сафардаги ўйинларда атиги 1 очко олиб, бу борада сўнгги ўринни банд этган. Қизиғи, бугунги рақиб «Тоттенҳэм» ҳам қолишмайди – Почеттино жамоаси сафардаги беш ўйиндан 2 дуранг қайд этган, холос. Лигада 17-кўрсаткич. Тўғри, «Эвертон»дан фарқли равишда «Тоттенҳэм» сафарда кучлилар билан ўйнаганини таъкидлаш керак – «Манчестер Сити», «Арсенал», «Лестер», «Ливерпуль». Бу ўйинларнинг учтасида «Тоттенҳэм» ҳисобда олдинда борган ҳам ҳатто.  

Таркиблар борасида, бу ўйинда мезбонлардан Бернард, Женк Тўсун, ҳамда Йери Мина майдонга туша олишмайди. Меҳмонлардан эса, Дэнни Роузда дисквалификация бор, Ламеланинг ўйнаши сўроқ остида, Льорис ҳали тиклангани йўқ. Райан Сессеньон эса, машғулотларга киришди ва ниҳоят «Тоттенҳэм» сафида дебют қилиши ҳам мумкин.

Жамоаларнинг Ливерпулда ўтган сўнгги 2 ўйини «Тоттенҳэм»нинг йирик ғалабаси билан якунланиб, бу ўйинларда меҳмонлар 9та гол йўллашган. «Эвертон»нинг бу рақиб устидан сўнгги ғалабаси 2012 йилнинг декабрига тўғри келади.

МИЛАН – ЛАЦИО

«Милан» ниҳоят сўнгги турда СПАЛ устидан ғалаба қозонди. Гўёки бурилиш нуқтаси, ғалабалар сериясини бошлаш учун яхши палла, лекин миланликларнинг тақвимига ҳавас қилиб бўлмайди. «Лацио» билан ўйиндан сўнг, «Милан»ни «Ювентус» майдонига сафар кутиб турибди. Кейин эса, «Наполи» «Сан-Сиро»да меҳмон бўлади. Бу уч ўйиндан имкон қадар очко олиш учун, аввало «Лацио» устидан ғалаба қозонилиши шарт. Акс ҳолда жамоа турнир жадвалининг иккинчи ярмига узоқ вақтга тушиб кетиши ва ҳатто бу Пиолининг истеъфоси билан ҳам тугаши мумкин. Хуллас, «Милан» учун уч очкодан бошқа муваффақиятли якун бўлмаслиги керак.

«Лацио» эса, айни пайтда жуда яхши спорт формасига кириб улгурди ва яна бир нечта шундай учрашув жамоани пешқадамларга анча яқинлаштириб қўяди. Аввалига «Аталанта»га қарши ўйинда 0:3 ҳисобида бой берилаётган ўйин қутқарилди. Кейин сўнгги дақиқадаги гол эвазига анча кучли ўйин намойиш қилаётган «Фиорентина» устидан сафарда ғалабага эришилди. Ўтган турда эса, «Лацио» «Торино»ни 4:0 ҳисобида енгди. Бу ўйинларда 6 гол ва 2 ассистни амалга оширган 29 ёшли Чиро Иммобиле ҳозирда А Серияда 4 гол устунлиги билан тўпурар бўлиб турибди. Шунингдек, ўртача рейтинг баҳолари бўйича ҳам Иммобиле Криштиану Роналду ва Алехандро Гомесни ортда қолдириб, биринчи ўринда бормоқда.

Ўзаро ўйинларга келсак, айтиш мумкинки, бу рақиблар у қадар голлар шодасини тақдим этишмайди. Охирги 6 ўйинда атиги 4 гол урилган ва 4 ўйин 0:0 ҳисобида тугагани, бизни кўпроқ ҳимоявий, тактик кураш кутиб турганидан далолат қилса керак. Миланда бўлиб ўтган сўнгги икки ўйин бир хил – 1:0 ҳисобида тугаган. Чемпионат ўйинида мезбонларнинг қўли баланд келган бўлса, апрелдаги кубок ўйинида Хоакин Корреанинг голи меҳмонларни ярим финалга олиб чиққан. Кейинчалик «Лацио» финалда «Ювентус» устидан ҳам ғолиб чиқиб, мамлакат кубогини қўлга киритганди. Умуман, жамоалар ўртасидаги сўнгги 24 ўйиннинг қарийб ярми – 11таси дуранг билан тугаган ва 7 ўйинда «Милан» ғалаба қозонган.

БОШҚА ЎЙИНЛАР

2 ноябрь. Борнмут – МАНЧЕСТЕР ЮНАЙТЕД (17:30), БАЙЕР – БОРУССИЯ М (19:30), Айнтрахт – БАВАРИЯ (19:30), Леванте – БАРСЕЛОНА (20:00), АРСЕНАЛ – Вулверҳэмптон (20:00), Астон Вилла – ЛИВЕРПУЛЬ (20:00), МАНЧЕСТЕР СИТИ – Саутҳэмптон (20:00), Болонья – ИНТЕР (22:00), Уотфорд – ЧЕЛСИ (22:30), РЕАЛ МАДРИД – Бетис (3 ноябрга ўтар кечаси, 01:00)