Грузия президентига импичмент билан таҳдид қилинди

Грузия президенти Саломе Зурабишвили Грузияда бирор ҳудудни эгаллаб олиш учун қурол ва армия ҳамда ривожланган иқтисодиёт йўқлиги ва ҳеч қачон бўлмаслигини айтгандан кейин «дарҳол истеъфога кетиши лозим». Буни Грузия мухолиф партияси «Ягона миллий ҳаракат» вакиллари талаб қилишган.

Грузия президенти Саломе Зурабишвили /Фото: EPA

Грузиянинг собиқ мудофаа вазири Георгий Барамидзенинг қўшимча қилишича, агар Зурабишвили кўнгилли тарзда кетмаса, мухолифат унга қарши импичмент жараёнини бошлайди. Барамидзенинг таъкидлашича, бунинг учун партия бошқа фракциялар ва мустақил депутатлар билан маслаҳатлашувларни бошлайди.

Шунингдек, Зурабишвилига импичмент эълон қилишга «Ягона Грузия – Демократик ҳаракат» мухолиф партияси аъзоси Анзор Бицадзе ҳам чақирган. Унинг айтишича, Грузия президентининг сўзлари «Грузия армиясига на бирор душман, на бирор дўст ҳеч қачон айтмаган ҳақорат» ҳисобланади.

Грузия президенти юқоридаги сўзларини мамлакатида АҚШ ҳарбий базалари жойлаштирилишини маъқуллашга тайёрмаслиги ҳақида гапирганда айтиб ўтган. Унинг таъкидлашича, Тбилиси иғвогарлик деб қабул қилиниши мумкин бўлган қадамларни амалга оширмаслиги лозим. Шу билан бирга Зурабишвили Грузиянинг НАТО ва Европа Иттифоқига киришга интилаётганини қўшимча қилган.