Продюсерлар гильдияси 2019 йилнинг энг яхши фильми ва сериалини аниқлади

Беверли-Ҳиллз шаҳарчасида АҚШ продюсерлар гильдияси мукофотини топшириш маросими бўлиб ўтди. Асосий «Энг яхши фильм» номинациясига режиссёр Сэм Мендеснинг «1917» ҳарбий драмаси лойиқ кўрилди.

Номинантлар орасида «Ирландиялик» (Irishman), «Паразитлар» (Parasite), «Бир куни... Ҳолливудда» (Once Upon a Time ...in Hollywood), «Никоҳ тарихи» (Marriage Story), «Жокер» (Joker), «Қуёнча Жожо» (Jojo Rabbit), «Форд Феррарига қарши» (Ford v Ferrari) ва «Митти аёллар» (Little Women) фильмлари бор эди.

Энг яхши анимацион фильм йўналишида ғолибликни «Ўйинчоқлар тарихи 4» (Toy Story 4) эгаллади. Унинг рақиблари: «Йўқолган ҳалқа» (Missing Link), «Аждаҳони қандай ўргатиш керак 3» (How to Train Your Dragon: The Hidden World), «Музюрак 2» (Frozen II) ва «Эверест» (Abominable).

Энг яхши мини-сериал мақоми «Чернобил»га берилди, ҳужжатли фильм йўналишида ғолиблик америкалик астронавтларнинг Ойга учиши ҳақида суратга олинган «Аполлон-11»га насиб этди. Шунингдек, «Ярамас» ва «Меросхўрлар» сериаллари ҳам Гильдия томонидан мукофотланди.