Оқ уй АҚШнинг бош инфекционистига конгрессда кўрсатма беришни тақиқлади

Оқ уй АҚШнинг бош инфекционисти ва иммунологи Энтони Фаучига президент Дональд Трампнинг коронавирус билан боғлиқ вазият бўйича ҳаракати борасида конгрессда кўрсатма беришини тақиқлади. 

Ҳозирда коронавирусга қарши кураш бўйича чоралар ишлаб чиқаётган кишиларнинг  конгрессда чиқиш қилиши "самарасиз бўлади", Фаучи "қулай вақтда сўроқ қилиниши мумкин", деди Оқ уй матбуот котибининг ўринбосари Жадд Дир.

АҚШ конгресси вакиллар палатасининг ассигнация қилиш бўйича қўмитаси раҳбари Эван Холландер NBC телекомпаниясига берган интервьюсида конгрессменлар Трампнинг коронавирус атрофидаги инқирозга нисбатан ҳаракати бўйича Фаучининг кўрсатмаларини тингламоқчи эканлигини маълум қилганди.  

Вакиллар палатасини коронавирусга қарши курашда сусткашлик қилгани учун Трампни кескин танқид қилаётган демократлар партияси аъзолари бошқаради.  

Энтони Фаучи Оқ уйнинг коронавирусга қарши кураш бўйича ишчи гуруҳининг бош экспертларидан бири ҳисобланади. У бир неча кун аввал айрим штатларни карантин чораларини бекор қилишга шошилмасликка чақирганди.

Трамп эса мамлакат иқтисодиёти дуч келадиган салбий оқибатларни юмшатиш учун чекловларнинг тезроқ бекор қилиниши тарафдори.

АҚШ коронавирусга чалинганлар сони бўйича дунёда етакчи бўлиб турибди. Мамлакатда ушбу касалликка чалинганлар сони 1,1 млн кишидан ошиб кетган, 66 минг киши вафот этган.