Мексикадаги аҳоли пунктида коронавирусдан ўлиш тақиқлаб қўйилди

Мексика жанубида жойлашган Соконуско муниципалитети раҳбари Роландо Росас маҳаллий аҳолига коронавирус келтириб чиқарувчи касалликдан ўлишни тақиқлаб қўйди.

Фото: Reuters

Мэрнинг айтишича, у шу тариқа аҳоли эътиборини коронавирус тарқалишига қарши қаратилган чораларга ҳали ҳам риоя қилиш лозимлигига қаратмоқчи бўлган. Бу ҳақда “Телевиса” телеканали хабар берди.

Росас бу тақиқлов ёзилган баннерни аҳоли пункти марказида ўрнатиб қўйган.

“Муниципалитет фармойишига кўра, унинг ҳудудида коронавирусдан ўлиш қатъий тақиқланади”, дейилган плакатдаги ёзувда.

5,2 минг киши яшайдиган Соконускода коронавирусдан зарарланиш бўйича бирорта ҳолат қайд этилмаган. Росаснинг айтишича, у шу йўл билан аҳолининг эътиборини эҳтиёткорлик чораларига ҳали ҳам риоя қилиш кераклигига қаратмоқчи бўлган. “Фикримча, бу стратегия иш берди”, деб айтган сиёсатчи “Диарио дель истмо” нашрига берган интервьюсида.

Айни вақтда Мексикада коронавирусга чалинганлар сони 26 мингдан ошиб кетди, ундан 2507 киши вафот этган. Ҳукумат 30 мартда соғлиқни сақлаш соҳасида фавқулодда вазият режими киритилиши ва биринчи аҳамиятга эга бўлмаган барча фаолият турлари тўхталишини эълон қилган.

Мамлакат президенти Андрес Мануэль Лопес Обрадор мамлакат одатий ҳаётга 1 июндан қайтиши мумкинлигини тахмин қилган.

Тайёрлаган Шуҳрат Раҳимов

#Мексика #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.