Қирғизистон парламенти 2 октябрга қадар фаолиятини тўхтатди

Парламент спикерининг сўзларига кўра, депутатларнинг бир қисми қайта сайланиш бўйича кампания ўтказаётгани учун ушбу қарор қабул қилинган.

Қирғизистон олий қонунчилик органи депутатлари 4 октябрда бўлиб ўтадиган парламент сайловлари муносабати билан 2 октябрга қадар фаолиятини тўхтатди. Бу ҳақда парламент спикери Дастанбек Жумабеков маълум қилди.

"Бугун депутатлар парламент фаолиятини 2020 йил 2 октябргача тўхтатиб туриш тўғрисида қарор қабул қилдилар", - деди у.

Спикернинг сўзларига кўра, депутатларнинг бир қисми қайта сайланиш бўйича кампания ўтказаётгани учун ушбу қарор қабул қилинган.

"Уларнинг парламент минбаридан ўз сайловолди тарғиботида фойдаланиши нотўғри бўлади", - деди Жумабеков.

Қирғизистонда парламент сайловлари 4 октябрда бўлиб ўтиши мўлжалланган. Айни пайтда мамлакат бош қонунчилик органи таркибидан олтита сиёсий партия вакиллари ўрин олган.