Qirg‘iziston parlamenti 2 oktyabrga qadar faoliyatini to‘xtatdi

Parlament spikerining so‘zlariga ko‘ra, deputatlarning bir qismi qayta saylanish bo‘yicha kampaniya o‘tkazayotgani uchun ushbu qaror qabul qilingan.

Qirg‘iziston oliy qonunchilik organi deputatlari 4 oktyabrda bo‘lib o‘tadigan parlament saylovlari munosabati bilan 2 oktyabrga qadar faoliyatini to‘xtatdi. Bu haqda parlament spikeri Dastanbek Jumabekov ma'lum qildi.

"Bugun deputatlar parlament faoliyatini 2020 yil 2 oktyabrgacha to‘xtatib turish to‘g‘risida qaror qabul qildilar", - dedi u.

Spikerning so‘zlariga ko‘ra, deputatlarning bir qismi qayta saylanish bo‘yicha kampaniya o‘tkazayotgani uchun ushbu qaror qabul qilingan.

"Ularning parlament minbaridan o‘z saylovoldi targ‘ibotida foydalanishi noto‘g‘ri bo‘ladi", - dedi Jumabekov.

Qirg‘izistonda parlament saylovlari 4 oktyabrda bo‘lib o‘tishi mo‘ljallangan. Ayni paytda mamlakat bosh qonunchilik organi tarkibidan oltita siyosiy partiya vakillari o‘rin olgan.