Фарғонадан Истанбулга илк парвоз амалга оширилди

31 мартдан бошлаб «Фарғона – Истанбул – Фарғона» йўналишида авиақатнов йўлга қўйилди. Мунтазам рейслар чоршанба ва шанба кунлари амалга оширилади.

Фото: KUN.UZ

31 март куни соат 8:50да Uzbekistan Airways'нинг HY277 рақамли рейси Фарғона халқаро аэропортидан Туркиянинг Истанбул шаҳрига қараб самога кўтарилди.

132 нафар йўловчини ўз бағрига олган Airbus A320 Neo учоғи 5 соат 40 минутда Истанбул халқаро аэропортига қўнди.

Фарғона халқаро аэропорти Ташишни ташкиллаштириш бўлими бошлиғи ўринбосари Эркинжон Обидовнинг Kun.uz мухбирига маълум қилишича, эндиликда «Фарғона – Истанбул – Фарғона» рейси ҳафтада икки марта – чоршанба ва шанба кунлари амалга оширилади.

Шу кунлари парвозни амалга оширган самолёт тушдан сўнг Истанбулдан Фарғонага HY278 рақамли рейс билан қайтиб келади.

31 март ҳолатига, чипта нархи бир томонга 2 877 040 сўмдан бошланади. Бориш ва қайтиш чиптасининг энг арзони 4 198 256 сўм этиб белгиланган. Нархлар ўзгариб туриши мумкин.

Эркинжон Обидовга кўра, 28 мартдан бошлаб Фарғонадан Самарқанд шаҳрига ҳафтасига 7 марта авиақатновлар йўлга қўйилди. Яқин келажакда эса Бухоро, Термиз вилоятлари ҳамда Дубай ва Сеул шаҳарларига ҳам тўғридан тўғри қатновлар йўлга қўйилиши кўзда тутилган.

Эслатиб ўтамиз, «Тошкент – Андижон – Тошкент» йўналишидаги авиақатнов икки ярим йиллик танаффусдан сўнг, 6 апрелдан бошлаб қайта йўлга қўйилмоқда.

#Фарғона #Истанбул

Kun.uz янгиликларини Google News'да кузатинг

+ Обуна бўлиш