Сувдан фойдаланиш тўғрисидаги ҳисоботлар электрон шаклга ўтказилади

Сувдан фойдаланиш ва сув истеъмолида сув ресурсларининг ҳисоби ва ҳисоботини ҳамда мониторингини юритиш тартиби тўғрисидаги низом тасдиқланди.

Низом билан сув ресурсларининг ҳисоботини юритишда замонавий ахборот-коммуникация технологиялари жорий этилади, шунингдек, соҳада мониторинг юритилади.

Бундан ташқари, сувдан фойдаланиш ва сув истеъмоли тўғрисидаги ҳисоботларни электрон шаклда юритишга ўтилади.

Сув олиш жойлари «онлайн» режимда ишлайдиган рақамли қурилмалар билан босқичма-босқич жиҳозланади ва маълумотларни узатиш бўйича дастурий таъминланади.

Ушбу низом 2021 йил 1 октябрдан амалга киритилади.

Маълумот учун, низом қоидалари коммунал сув таъминоти тизимидан сув олувчи фойдаланувчилар ва сув истеъмолчиларига нисбатан татбиқ этилмайди.

Аввалроқ Ўзбекистон бўйлаб жорий этилаётган электр энергиясини ҳисобга олиш ва назорат қилишнинг автоматлаштирилган тизими (АСКУЭ) билан боғлиқ истеъмолчилар дуч келаётган муаммолар ҳақида маълум қилинганди.