USAID’нинг Ўзбекистондаги миссияси биринчи директори иш бошлади

«Янги миссиянинг ташкил этилиши АҚШнинг 2020 йилда қабул қилинган ва Байден маъмурияти томонидан яқинда қўллаб-қувватланган Марказий Осиё стратегиясининг бир қисми. Мен учун USAID миссиясининг Ўзбекистондаги биринчи директори бўлиш катта шараф. Бу муҳим вазифани масъулият билан бошлайман», дея Микаэла Мередит сўзларини келтирмоқда манба. 

Маълум қилинишича, Микаэла Мередит ривожланиш соҳасида 30 йиллик тажрибага эга. У мазкур лавозимга тайинлангунига қадар 2018–2021 йилларда USAID’нинг Албаниядаги вакили ва 2015–2018 йилларда Озарбойжонда USAID миссиясининг директори бўлиб ишлаган. Шунингдек, Яман, Нигерия, Конго ва Вашингтонда турли лавозимларда фаолият олиб борган. 

Маълумот учун, USAID’нинг Ўзбекистондаги икки томонлама миссияси 2020 йил сентябр ойида ташкил этилган. 

Агентлик Ўзбекистонда иқтисодий ўсишни яхшилаш, савдо-сотиқ ва хусусий секторни ривожлантиришга қаратилган ташаббусларни қўллаб-қувватлаб келади. Шу билан бирга, ташкилот республикага таълим, сув хўжалиги, соғлиқни сақлаш, қонун устуворлигини, хавфсиз миграцияни таъминлаш ва одам савдосига қарши курашишда ҳам кўмаклашади.

USAID’нинг Ўзбекистон билан ҳамкорлиги 1992 йилдан бошланган. Шу пайтга қадар Америка халқи USAID орқали Ўзбекистоннинг ривожланиш дастурларига 500 млн доллардан кўпроқ маблағ ажратган.

Айни пайтда USAID Ўзбекистон ҳукумати билан мамлакат иқтисодиётини диверсификация қилиш ва минтақавий савдони ошириш, соғлиқ учун жиддий таҳдидларни, шу жумладан, Covid-19ни бартараф этиш ва ҳукуматнинг аҳоли эҳтиёжларини қондириш салоҳиятини ошириш учун ҳамкорлик қилмоқда.