Буюк Британияда ёнилғи инқирози келиб чиқди

Буюк Британияда ёнилғи тақчиллиги сабабли АЁҚШлар оммавий равишда ёпилмоқда, деб хабар берди Associated press.

Ишлаб турган АЁҚШларда улкан навбатлар пайдо бўлган. Ҳайдовчилар навбати келишини соатлаб кутишига тўғри келмоқда.

Қарийб 5500та сотув нуқтасини бирлаштирувчи Чакана бензин сотувчилар ассоциацияси унинг аъзоларининг учдан икки қисми ихтиёрларидаги ёнилғини сотиб бўлганини, қолганларда эса захира тез орада тугашини маълум қилди.

Ёнилғи инқирози юк машиналари ҳайдовчилари етишмаслиги оқибатида юзага келган етказиб беришдаги узилишлар сабабли пайдо бўлди.

Қайд этилишича, мамлакатда ёнилғи етарли, бироқ у терминалларда ва нефтни қайта ишлайдиган заводларда турибди.

Транспорт соҳаси вакилларининг билдиришича, Буюк Британияда ўн минглаб юк машиналари ҳайдовчилари етишмаяпти. Бунга коронавирус пандемияси ва мамлакат ЕИдан чиқиб кетганидан сўнг хорижлик ишчиларнинг кетиб қолиши сабаб қилиб кўрсатилмоқда.

Буюк Британия ҳукумати хорижлик ҳайдовчилар учун минглаб тезкор виза беришини эълон қилган. Хусусан, октябрдан юк машиналари ҳайдовчилари учун 5 мингта уч ойлик визалар берилиши бошланади.