Тошкентда парламентлараро иттифоқ аёл раҳбарлари саммити бошланди

Саммит 8-9 сентябр кунлари “Парламент етакчи роли: янада самарали барқарорлик ва фаровонликни таъминлашда хавф-хатарни баҳолаш” мавзусида бўлиб ўтмоқда. Форумда БМТ, парламентлараро иттифоқ, Европада хавфсизлик ва ҳамкорлик ташкилоти парламентлараро ассамблеяси, МДҲ парламентлараро ассамблеяси раҳбарлари, 17 та давлат парламентлари 120 дан ортиқ вакиллари иштирок этмоқда.

Саммитда парламентлар олдидаги устувор вазифалар ва пандемия сабабли юзага келган инқироз жараёнларида гендер тенглигини кафолатлаш, барқарор ривожланиш ва фаровонликни таъминлаш, аёллар иқтисодиёт тикланишидаги имкониятларини кенгайтириш соҳаларидаги ҳаракат йўналишлари муҳокама қилинади.

Парламентлараро иттифоққа аъзо давлатлар парламентлари аёл раҳбарлари 14-саммитини Ўзбекистон Сенати раиси Танзила Норбоева очди. Тадбир аввалида давлат раҳбари матбуот котиби Шерзод Асадов президент Шавкат Мирзиёевнинг халқаро форум иштирокчиларига йўллаган мурожаатини ўқиб эшиттирди.

Парламентлараро иттифоқ 200 га яқин мамлакат парламентларини бирлаштиради ва мулоқот учун энг йирик платформа ҳисобланади. Ўтган йили Венада бўлиб ўтган парламентлараро иттифоққа аъзо давлатлар парламентлари аёл раҳбарлари саммитида навбатдаги анжуманни Ўзбекистонда ўтказишга қарор қилинганди.