Шинжондаги уйғурларга нисбатан жиноятларни текширишга 19 давлат қарши чиқди

БМТнинг Инсон ҳуқуқлари бўйича кенгаши 51-сессиясида Хитойнинг Шинжон-Уйғур автоном вилоятидаги инсон ҳуқуқлари билан боғлиқ вазиятни муҳокама қилиш ва махсус йиғилиш ўтказиш бўйича сўров рад этилди.

Қайд этилишича, лойиҳани 17 та давлат қўллаб-қувватлаган, 11та давлат бетараф қолган, 19 та давлат эса қарши овоз берган. Хусусан, овоз бериш натижалари қуйидагича бўлган:

Қўллаб-қувватлаганлар: Чехия, Финландия, Франция, Германия, Гондурас, Япония, Литва, Люксембург, Маршалл ороллари, Черногория, Нидерландия, Парагвай, Польша, Жанубий Корея, Сомали, Буюк Британия ва АҚШ.

Қаршилар: Боливия, Камерун, Хитой, Кот-д'Ивуар, Куба, Эритрея, Габон, Индонезия, Қозоғистон, Мавритания, Намибия, Непал, Покистон, Қатар, Сенегал, Судан, БАА, Ўзбекистон ва Венесуэла.

Бетарафлар: Аргентина, Арманистон, Бенин, Бразилия, Гамбия, Ҳиндистон, Ливия, Малави, Малайзия, Мексика ва Украина.

Шу тариқа, Хитойнинг мусулмон аҳолиси ҳуқуқлари бузилиши масаласи БМТнинг Инсон ҳуқуқлари бўйича кенгаши кун тартибига киритилмади.

Аввалроқ, Бирлашган миллатлар ташкилотининг Инсон ҳуқуқлари бўйича Олий комиссар бошқармаси Шинжон-Уйғур автоном вилоятидаги ҳуқуқбузарликлар ҳақида узоқ кутилган ҳисоботини эълон қилганди. Ҳужжатда минтақадаги уйғурлар ва бошқа мусулмон озчиликлар ҳуқуқларининг бир қатор бузилиши тафсилотлари баён этилган, аммо АҚШ ва бошқа давлатлар томонидан айтилган айблов - геноцид ҳақида сўз юритилмаганди.

Хитой ҳукумати уйғурларга қарши юқори технологик кузатувлар олиб бориш ва уларни фарзандлар ота-оналаридан ажратиладиган мажбурий меҳнат лагерларига жўнатишда айблаб келинмоқда. Расмий Пекин эса лагерлар кўнгилли таълим ва малака ошириш учун ташкил қилинганини айтиб келади.

АҚШ ҳукумати Хитойнинг Шинжон-Уйғур мухтор вилоятидаги уйғурларга нисбатан ҳаракатларини «геноцид» ва «инсониятга қарши жиноят» деб ҳисоблайди. Хитой ҳукумати эса даъволарни «Хитой душманлари томонидан тўқиб чиқарилган дезинформация ва ёлғон» деб рад этади.