Иркутскда ҳарбий самолёт уй устига қулади. Учувчилар ҳалок бўлган

Су-30 русумли ҳарбий самолёт Иркутскдаги икки қаватли турар жой биносига қулади. ФВВ икки учувчи ҳам ҳалок бўлганини маълум қилди. Дастлабки маълумотларга кўра, аҳоли орасида жабрланганлар йўқ.

Дмитрий Емчук / ТАСС

ФВВ баёнотига кўра, Су-30 самолёти синов парвози чоғида хусусий сектордаги қурилиш биносига қулаган. Воқеа жойида ёнғин келиб чиққан ва 200 кв.м майдонни қамраб олган.

Маҳаллий расмийларга кўра, самолёт ҳалокатидан сўнг 150 уй электр таъминотисиз қолган.

«Воқеа жойида иш олиб борилмоқда. Бу ерда очиқ ёнғинларни бартараф ишлари кетмоқда. Икки учувчи ҳам ҳалок бўлган. Маҳаллий аҳоли вакилларидан ҳеч ким жабрланмаган. Қулаш манзили аниқлаштирилган - бу Пржевальский кўчаси, 32-уй. Бу икки оила учун мўлжалланган 100 кв. м. майдондаги турар жой биноси. СУ самолёти синов парвозини амалга ошираётган бўлган», дея ёзади регион губернатори Игор Кобзев.

Телеграм-каналларда самолёт ҳалокатидан кейин бошланган йирик ёнғин тасвирлари акс этган видеолар тарқалган.

Тергов қўмитаси томонидан ҳаво транспорти хавфсизлиги ва улардан фойдаланиш қоидалари бузилиши моддалари бўйича жиноий иш қўзғатилган.

Су-30 - «Сухой» конструкторлик бюроси томонидан ишлаб чиқилган ва Иркутскдаги авиация заводида серияли ишлаб чиқарилиши йўлга қўйилган «4+» авлодидаги кўп функцияли қирувчи самолёт ҳисобланади.

Украинадаги уруш даврида Россия ҳудудида қулаган 11-ҳарбий самолёт

24 феврал куни Воронеж яқинида Ан-26 самолёти қулайди. Экипаж ҳалок бўлган;
8 апрел куни Ленинград областида МиГ-31 қирувчиси қулаган. Экипаж катапульта қилинган;
17 июн куни Белгород областида Су-25 самолёти ҳалокатга учраган. Учувчи катапульта бўлишга улгурган;
21 июн куни Ростов областида Су-25 штурмовики ҳалокатга учраган. Учувчи ҳалок бўлган;
24 июн куни Рязанда Ил-76 ҳалокатга учраган. Тўрт киши қурбон бўлган;
11 сентябр куни Қримда Су-34 ҳарбий самолёти қулаган. Учувчилар омон қолган;
1 октябр куни Қримдаги «Белбек» аэродромида самолёт ҳалокатга учраган. Учувчи катапульта қилган;
9 октябр куни Ростов областидаги дала майдонига Су-34 қулаб тушган. Учувчилар катапульта қилинган;
9 октябр куни Ростов областида яна бир ҳарбий самолёт — Су-25 қулаган. Учувчи ҳалок бўлган;
Бир ҳафта муқаддам, 17 октябр куни Краснодар ўлкасидаги Ейск шаҳрида Су-34 русумли қирувчи-бомбардимончи самолёт аҳоли яшаш ҳудуди қулаган, натижада 15 киши, жумладан, уч нафар бола ҳалок бўлганди. Ҳарбий самолёт қулаш чоғида тўққиз қаватли уйга урилиб кетганди.