Irkutskda harbiy samolyot uy ustiga quladi. Uchuvchilar halok bo‘lgan

FVV bayonotiga ko‘ra, Su-30 samolyoti sinov parvozi chog‘ida xususiy sektordagi qurilish binosiga qulagan. Voqea joyida yong‘in kelib chiqqan va 200 kv.m maydonni qamrab olgan.

Mahalliy rasmiylarga ko‘ra, samolyot halokatidan so‘ng 150 uy elektr ta’minotisiz qolgan.

«Voqea joyida ish olib borilmoqda. Bu yerda ochiq yong‘inlarni bartaraf ishlari ketmoqda. Ikki uchuvchi ham halok bo‘lgan. Mahalliy aholi vakillaridan hech kim jabrlanmagan. Qulash manzili aniqlashtirilgan - bu Prjyevalskiy ko‘chasi, 32-uy. Bu ikki oila uchun mo‘ljallangan 100 kv. m. maydondagi turar joy binosi. SU samolyoti sinov parvozini amalga oshirayotgan bo‘lgan», deya yozadi region gubernatori Igor Kobzev.

Telegram-kanallarda samolyot halokatidan keyin boshlangan yirik yong‘in tasvirlari aks etgan videolar tarqalgan.

Tergov qo‘mitasi tomonidan havo transporti xavfsizligi va ulardan foydalanish qoidalari buzilishi moddalari bo‘yicha jinoiy ish qo‘zg‘atilgan.

Su-30 - «Suxoy» konstruktorlik byurosi tomonidan ishlab chiqilgan va Irkutskdagi aviatsiya zavodida seriyali ishlab chiqarilishi yo‘lga qo‘yilgan «4+» avlodidagi ko‘p funksiyali qiruvchi samolyot hisoblanadi.

Ukrainadagi urush davrida Rossiya hududida qulagan 11-harbiy samolyot

• 24 fevral kuni Voronej yaqinida An-26 samolyoti qulaydi. Ekipaj halok bo‘lgan;
• 8 aprel kuni Leningrad oblastida MiG-31 qiruvchisi qulagan. Ekipaj katapulta qilingan;
• 17 iyun kuni Belgorod oblastida Su-25 samolyoti  halokatga uchragan. Uchuvchi katapulta bo‘lishga ulgurgan;
• 21 iyun kuni Rostov oblastida Su-25 shturmoviki halokatga uchragan. Uchuvchi halok bo‘lgan;
• 24 iyun kuni Ryazanda Il-76 halokatga uchragan. To‘rt kishi qurbon bo‘lgan;
• 11 sentabr kuni Qrimda Su-34 harbiy samolyoti qulagan. Uchuvchilar omon qolgan;
• 1 oktyabr kuni Qrimdagi «Belbek» aerodromida samolyot halokatga uchragan. Uchuvchi katapulta qilgan;
• 9 oktyabr kuni Rostov oblastidagi dala maydoniga Su-34 qulab tushgan. Uchuvchilar katapulta qilingan;
• 9 oktyabr kuni Rostov oblastida yana bir harbiy samolyot — Su-25 qulagan. Uchuvchi halok bo‘lgan;
• Bir hafta muqaddam, 17 oktyabr kuni Krasnodar o‘lkasidagi Yeysk shahrida Su-34 rusumli qiruvchi-bombardimonchi samolyot aholi yashash hududi qulagan, natijada 15 kishi, jumladan, uch nafar bola halok bo‘lgandi. Harbiy samolyot qulash chog‘ida to‘qqiz qavatli uyga urilib ketgandi.