Хитой Россияга қурол етказиб бериши ҳақидаги баёнотни «хато» деб атади

АҚШ давлат котиби Блинкеннинг айтишича, Пекин Москвага ёрдам кўрсатиш имкониятларини ўрганмоқда. Хитой Ташқи ишлар вазирлиги Америка дипломатияси раҳбарининг баёнотларини хато деб атади.

Ван Венбин / Фото: Reuters

Хитой Россиянинг Украинага қарши урушида фойдаланиш учун РФга қурол етказиб бериши режаларини рад этди. 20 февраль, душанба куни Хитой Ташқи ишлар вазирлиги матбуот котиби Ван Венбин АҚШ давлат котиби Энтони Блинкеннинг даъволари «нотўғри маълумот» эканини айтди. «Жанг майдонига доимий равишда қурол жўнатиб турадиган» Хитой эмас, АҚШ, деди дипломат.

Пекин «Хитой-Россия муносабатлари масаласи бўйича АҚШнинг ҳеч қандай кўрсатмаларини» қабул қилмайди, деди Хитой ТИВ матбуот котиби. Вашингтон ўз ҳаракатларини «жиддий» кўриб чиқиши ҳамда «вазиятни юмшатиш, тинчлик ва мулоқотни ривожлантириш» ва «айбловлар ва дезинформациялар тарқалишини» тўхтатиш учун фаолроқ чоралар кўриши керак, дея қўшимча қилди хитойлик дипломат.

АҚШ Давлат департаменти раҳбари куни кеча CBS телеканалининг Face The Nation эфирида Хитой Украинага қарши урушда Россияга «қурол билан ёрдам кўрсатиш имкониятини кўриб чиқаётганини» айтди. Блинкен қўшимча қилишича, бу ёрдам «ўқ-дорилардан тортиб қуролларгача» бўлиши мумкин.