Трампнинг Россия билан алоқаларига оид ФТБ текширувида қонунбузарликлар аниқланди

Доналд Трамп даврида лавозимга тайинланган АҚШ махсус прокурори Жон Дарем ФТБ АҚШ собиқ президентининг Россия билан алоқаларига қизиқиб қолган ҳолатлар юзасидан терговни якунлади. 15 май, душанба куни чоп этилган ҳисоботида Дарем ФТБ тергов ўтказиш учун етарли асосга эга эмас деган хулосага келди.

Ҳисоботда айтилишича, Федерал тергов бюросининг "тасдиқланмаган разведка маълумотлари" асосида тергов бошлаган "тезлиги ва усули" "агентлик ўтмишдаги шунга ўхшаш ишларни тергов қилган услубдан сезиларли даражада четга чиқишни" акс эттиради. Махсус прокурорнинг сўзларига кўра, ФТБнинг алоҳида ходимлари “Трампга нисбатан кучли душманлик туйғулари”га эга эди.

Доналд Трамп махсус прокурорнинг хулосаларидан мамнун бўлди. Собиқ президент сўзларига кўра, АҚШ Адлия вазирлиги ва Федерал тергов бюроси тергов бошлаганида “Америка жамоатчилиги алданган”. Ўз навбатида, ФТБ ўз вақтида “ўнлаб тузатиш чоралари” кўрилганида, тергов давомида йўл қўйилган хатоларнинг олдини олиш мумкин бўлганини билдирди.

АҚШ расмийлари Россияни 2016 йилги президентлик сайловларига таъсир ўтказишга уринишда бир неча бор айблаган. 2019 йил баҳорида АҚШ махсус прокурори Роберт Мюллернинг Россиянинг сайловларга аралашуви бўйича тергови якунланди. Махсус прокурор Россия вакилларининг сайловолди пойгасига аралашишга уринишларини фош қилди, бироқ овоз беришдан кейин давлат раҳбари бўлган Доналд Трампнинг сайловолди штаби Россия расмийлари билан тил бириктирганини исботлай олмади.