Туркияда музлаткичдан уч аёл ва бир эркакнинг жасади топилди

Марҳумларнинг барчаси Туркманистон фуқаролари экани айтилмоқда. Полиция ҳолат қотиллик сифатида баҳолаб, ушбу жиноятда гумонланаётган шахсни қидирувга берган.

Фото: Türkiye Gazetesi

Туркиянинг Измир шаҳридаги уйларнинг биридан 4 кишининг жасади топилган. ОАВнинг маълум қилишича, уч аёл ва бир эркакнинг мурдаси бўлакларга бўлинган ҳолда катта музлаткич ичига жойланган. Айни пайтда уй атрофи полиция томонидан ўраб олинган.

Дастлабки текширувлардан сўнг жасадлар Туркманистон фуқароларига тегишли экани аниқланган. Полиция марҳумлар қасддан ўлдирилган деб ҳисобламоқда. Туркманистонлик бир эркак қотилликда гумонланиб қидирувга берилган. Полиция гумонланувчини қўлга олиш ҳаракатлари ва тергов ишларини давом эттирмоқда.

“Маҳалламизда бундай иш содир бўлгани бизни қайғуга солди. Бу оилавий фожиа бўлгани ҳақида эшитдик. Воқеа қачон содир бўлгани маълум эмас. Полициячиларнинг айтишича, қотил уларни аввал ўлдириб, бир неча кундан сўнг уларни бўлаклаб музлаткичга жойлаган. Марҳумларнинг Истанбулдаги қариндошларидан бири оила ҳақида ҳеч қандай хабар бўлмагач, бу ерга келган ва эшик очиқ ётганини кўрган” дейди ҳодиса содир бўлган Адолат маҳалласида яшовчи Ферҳат Ўзкул.

Маҳаллий нашрлар жасадлар прокурор томонидан кўздан кечирилганидан сўнг ёриб кўриш учун Измир суд-тиббиёт экспертизаси институтига юборилиганини ёзишмоқда.