Йирик брендларни жалб қилган корхоналарга 50 млн сўмдан грант ажратилади

Президент Шавкат Мирзиёев тадбиркорлар билан очиқ мулоқот ўтказмоқда.

Фото: Президент матбуот хизмати

Давлат раҳбари экспортни кенгайтириш бўйича яна бир катта имконият – бу нуфузли хорижий брендларни мамлакатга жалб қилиш эканини таъкидлади.

Йиллик бозори 100 миллиард доллардан ошадиган дунёнинг энг машҳур 50 та бренди корхоналар билан ишлашга катта қизиқиш билдирмоқда. Испания, Германия, Польша, Туркиянинг йирик брендлари билан музокаралар ўтказилган. Улар маҳаллий корхоналарга 3 миллиард долларлик буюртма беришга ҳозирнинг ўзида тайёр.

Бунинг учун 3 та энг катта масала ҳал қилинади. Жумладан:

- ишлаб чиқаришга халқаро стандартлар, экология ва сертификатлаш талаблари жорий қилинади. Бунинг учун маҳаллий корхоналарнинг мутахассислари уларнинг талаби асосида ўқитилади;

- маҳаллий корхоналардаги ишчиларга муносиб меҳнат шароитлари яратиб берилади;

- брендларнинг маҳсулотларини олиб кириш ва экспорт қилиш учун қулай божхона режими жорий қилинади.

Йирик брендларни жалб қилган корхоналарга 50 миллион сўмдан грант ажратилади.

Президент Германиянинг “Дизель” брендини жалб қилган Намангандаги “Фазман текстил” корхонасига ҳамда АҚШнинг “Найк” брендини жалб қилган Андижондаги “Сино интернейшнл” корхонасига биринчи бўлиб ушбу грантни беришни таклиф қилди.