Венада Тейлор Свифтнинг концертлари теракт таҳдиди туфайли бекор қилинди

Австрияда америкалик қўшиқчи Тейлор Свифтнинг концертида теракт уюштиришга тайёргарлик кўрган икки гумонланувчи қўлга олинди. Полиция манбалари яна уч киши қидирилаётганини айтди.

Фото: Alex Halada/APA/dpa/picture alliance

Америкалик эстрада юлдузи Тейлор Свифтнинг Венада бўлиб ўтадиган учта концерти ҳам бекор қилинди, деб хабар берди шоу ташкилотчиси Barracuda Music 7 август, чоршанба куни кечки пайт. «Ҳокимият томонидан «Эрнст Ҳаппел» стадионида режалаштирилган теракт тасдиқлангани сабабли, барчанинг хавфсизлиги учун режалаштирилган учта концертни бекор қилишдан бошқа иложимиз йўқ», — дейилади баёнотда.

Аввалроқ Австрия полицияси Вена ва Қуйи Австрия федерал ерининг Терниц шаҳрида терактга тайёргарлик кўришда гумон қилинган икки шахс ҳибсга олингани ҳақида хабар берган эди. Ҳуқуқ-тартибот идоралари вакилларининг сўзларига кўра, қўлга олинганлар Вена ва унинг атрофидаги оммавий тадбирларда терактлар уюштириш бўйича аниқ режаларга эга бўлган. Тинтув чоғида хонадонлардан бирида кимёвий моддалар топилиб, унинг таркиби ўрганилмоқда.

Ҳибсга олинганлардан бири - 19 ёшли Австрия фуқароси - ИШИД террорчилик ташкилотининг амалдаги раҳбарига содиқликка қасамёд қилган. Полиция ҳибсга олинган иккинчи шахс ҳақида ҳеч қандай маълумот бермади. Kurier газетасининг ёзишича, у 17 ёшда. Полициядаги манбаларнинг ORF.at нашрига маълум қилишича, яна уч нафар гумонланувчи қидирилмоқда.

Австрия канцлери: Фожианинг олди олинди

Австрия федерал канцлери Карл Нехаммер Тейлор Свифт концертлари атрофида жуда жиддий вазият бўлганини эълон қилди. «Полициямизнинг хорижий хизматлар билан жадал ҳамкорлиги туфайли хавфни ўз вақтида тан олиш, чора кўриш ва фожианинг олдини олиш мумкин бўлди», — деб ёзди у Х ижтимоий тармоғида.

«Биз Ғарб ҳаёт тарзимизга ҳужум қилиш учун зўравонлик воситалари қўлланадиган даврда яшаяпмиз», деди Нехаммер. Терроризм кўплаб Ғарб давлатларида хавфсизлик ва эркинликка таҳдид солади, шунинг учун ҳушёр бўлиш, бир-бирини қўллаб-қувватлаш ва қатъий курашиш муҳим, дейди у.

Тейлор Свифтнинг Венадаги учта концертидан биринчиси пайшанба куни бўлиб ўтиши керак эди. Ҳар бир томоша учун 60 мингга яқин чипта сотилган. Ташкилотчи чипталар учун пулни ўн иш куни ичида қайтаришга ваъда берди.