Шавкат Мирзиёев «Махтумқули Фироғийнинг 300 йиллиги» эсдалик медали билан тақдирланди

Ўзбекистон президенти Махтумқули Фироғий таваллудининг 300 йиллигига бағишланган медаль билан тақдирланди. Бу ҳақда Президент матбуот хизмати хабар берди.

Қайд этилишича, шоир ва мутафаккир Махтумқули Фироғий юбилейига бағишланган халқаро форум якунида Ўзбекистон президенти Шавкат Мирзиёевни тақдирлаш маросими бўлиб ўтган.

Туркман халқининг миллий етакчиси, Туркманистон Халқ Маслаҳати раиси Гурбангули Бердимуҳамедов давлатимиз раҳбарига «Махтумқули Фироғийнинг 300 йиллиги» эсдалик медалини тантанали равишда топширган.

Аввалроқ Шавкат Мирзиёев Ашхобод шаҳрига ташрифи доирасида Туркман халқининг миллий етакчиси Гурбангули Бердимуҳамедов билан учрашув ўтказгани тўғрисида хабар берилганди. Учрашувда Ўзбекистон раҳбари Туркман халқининг миллий етакчисига Махтумқулининг ўзбек тилида нашр этилган танланган асарлари тўпламини совға қилган (https://kun.uz/kr/news/2024/10/11/shavkat-mirziyoyev-ashxobodda-gurbanguli-berdimuhamedov-bilan-uchrashuv-otkazdi).

Туркман халқининг улуғ фарзанди Махтумқули Фироғий нафақат туркий халқлар, айни пайтда жаҳон адабиёти ва маданияти тарихида алоҳида ўрин эгаллаган атоқли шоир ва мутафаккирдир. У 1724 йилда туғилган. Хивадаги машҳур Шерғозихон мадрасасида таълим олган. 

Махтумқули туркман шеърий тилини сезиларли даражада ўзгартириб, уни халқ нутқига яқинлаштирган. Шунингдек, у туркман адабиёти учун анъанавий бўлган араб-форс ўлчовидан воз кечиб, унинг ўрнига бўғинлар тизимини жорий қилган. 1807 йилда вафот этган ва Эронда дафн этилган.